admin
रत्नागिरी : प्रतिनिधी
संगमेश्वर तालुक्यातील पाचांबे येथील गायकवाडवाडी परिसरात एका नर बिबट्याचा कुजलेल्या अवस्थेतील मृतदेह आढळून आल्याने परिसरात मोठी खळबळ उडाली आहे. रस्त्याच्या कडेला २८ सप्टेंबर रोजी सायंकाळच्या सुमारास ही घटना उघडकीस आली. कुचांबे येथील स्थानिक नागरिक अविनाश भिकाजी टाकळे यांना रस्त्यालगत मृतदेह दिसताच त्यांनी तात्काळ संगमेश्वर वन विभागाशी संपर्क साधून घटनेची माहिती दिली. माहिती मिळताच वन विभागाच्या पथकाने तातडीने घटनास्थळी धाव घेत पाहणी व पंचनामा केला.
प्राथमिक पाहणीनुसार या नर बिबट्याचा मृत्यू साधारण ९ ते १० दिवसांपूर्वी झाला असावा, असा अंदाज वर्तवण्यात आला आहे. प्रदीर्घ कालावधी लोटल्याने मृतदेह पूर्णपणे सडलेल्या अवस्थेत होता. घटनेची माहिती मिळताच कडवई येथील पशुधन विकास अधिकाऱ्यांनी घटनास्थळी दाखल होऊन मृतदेहाची वैद्यकीय तपासणी केली. प्राथमिक तपासणीनुसार बिबट्याचा मृत्यू नैसर्गिक कारणांमुळे झाला असावा, असा निष्कर्ष पशुवैद्यकीय अधिकाऱ्यांनी नोंदवला आहे.
वैद्यकीय सोपस्कार पूर्ण झाल्यानंतर शासकीय नियमावलीनुसार घटनास्थळीच लाकडाची चिता रचून बिबट्यावर अग्निसंस्कार करण्यात आले आणि सर्व अवशेष पूर्णपणे नष्ट करण्यात आले. ही संपूर्ण कार्यवाही चिपळूण-रत्नागिरीच्या विभागीय वन अधिकारी गिरीजा देसाई, सहाय्यक वनसंरक्षक प्रियंका लगड आणि परिक्षेत्र वनाधिकारी विक्रम गुरव यांच्या मार्गदर्शनाखाली पार पडली. या मोहिमेत वनपाल सागर गोसावी, वनरक्षक सूरज तेली, सहयोग कराडे, आकाश कडूकर, कुटगिरीच्या पोलिस पाटील यांच्यासह स्थानिक प्राणीमित्र प्रणित टाकळे आणि शंकर जागुष्टे यांनी सक्रिय सहभाग घेतला.
