admin
रत्नागिरी : प्रतिनिधी
एकात्मिक बाल विकास सेवा योजना प्रकल्प (रत्नागिरी-२) अंतर्गत मालगुंड बीटमधील गणपतीपुळे, मालगुंड आणि नेवरे परिसरात ‘सेवा संकल्प अभियान’ तसेच ‘राष्ट्रीय पोषण अभियान’ अत्यंत उत्साहात राबविण्यात आले. या अभियानाच्या माध्यमातून महिला व बालविकास विभागामार्फत सर्वसामान्यांसाठी चालवल्या जाणाऱ्या विविध शासकीय कल्याणकारी योजनांची माहिती थेट तळागाळातील नागरिकांपर्यंत पोहोचवून जनजागृती करण्यात आली.
या जनजागृती मोहिमेत राज्य शासनाची महत्त्वाकांक्षी ‘लेक लाडकी योजना’ आणि केंद्र शासनाची ‘प्रधानमंत्री मातृवंदना योजना’ यांसह महिला व बालकांच्या सक्षमीकरणासाठी असलेल्या विविध योजनांचे स्वरूप, आवश्यक निकष आणि मिळणारे लाभ याविषयी महिलांना सविस्तर मार्गदर्शन करण्यात आले. केवळ माहिती देण्यापुरते मर्यादित न राहता, आरोग्य आणि स्वच्छतेचे महत्त्व पटवून देण्यासाठी समुद्रकिनाऱ्यावर स्वच्छता मोहीम राबवून परिसर स्वच्छ करण्यात आला. तसेच पर्यावरण रक्षणाचा संदेश देत नेवरे येथे वृक्षारोपणाचा कार्यक्रमही पार पडला.
या सामाजिक उपक्रमास जिल्हा परिषद सदस्य राजेश साळवी, पंचायत समिती सदस्या पूर्वा दुर्गुडे, गटविकास अधिकारी शेळके यांच्यासह विविध विभागांचे अधिकारी व कर्मचारी उपस्थित होते. त्याचप्रमाणे आयसीडीएस प्रकल्प-२ (मालगुंड बीट) च्या पर्यवेक्षिका, ग्रामसेवक, मालगुंड ग्रामपंचायतीच्या सरपंच खेऊर, ग्रामपंचायत सदस्य, पोलीस पाटील आणि परिसरातील स्थानिक महिला व ग्रामस्थ मोठ्या संख्येने सहभागी झाले होते.
