रत्नागिरी जिल्हा मध्यवर्ती सहकारी बँकेची सुवर्णझेप: ६००० कोटींच्या एकत्रित व्यवसायाचा टप्पा यशस्वीपणे पूर्ण

रत्नागिरी : प्रतिनिधी

रत्नागिरी जिल्हा मध्यवर्ती सहकारी बँकेने आपल्या यशाची घोडदौड कायम राखत ३० सप्टेंबर २०२६ अखेर तब्बल ६००० कोटी रुपयांच्या एकत्रित व्यवसायाचा टप्पा यशस्वीपणे पार केला आहे. ग्राहकांचा दृढ विश्वास आणि बँकेने दिलेल्या उत्कृष्ट व विनम्र सेवांच्या जोरावर बँकेने या अर्धवार्षिक अहवालात हा मोठा बहुमान मिळवला आहे. यासोबतच बँकेने ४९ कोटी १३ लाख ३६ हजार रुपयांचा घसघशीत नफाही कमावला असून राज्यातील अग्रगण्य बँक म्हणून आपली वाटचाल अधिक भक्कम केली आहे.
​गतवर्षीच्या सप्टेंबर महिन्याच्या तुलनेत यावर्षी बँकेच्या नफ्यामध्ये १० कोटी ७४ लाखांची लक्षणीय वाढ झाली आहे. नफ्यातील ही वाढ बँकेच्या यशस्वी वाटचालीची साक्ष देते. राज्यातील अग्रगण्य जिल्हा बँक म्हणून नावलौकीक असलेल्या या बँकेने नेहमीच ग्राहक सेवा आणि आधुनिकतेला प्राधान्य दिले आहे. सध्या बँकेमार्फत ग्राहकांना एनईएफटी, आरटीजीएस, एटीएम, मोबाईल बँकिंग आणि क्यूआर कोड यांसारख्या आधुनिक सुविधा पुरवल्या जात आहेत. या डिजिटल प्रवासात आणखी एक पाऊल पुढे टाकत, ग्राहकांच्या सोयीसाठी बँक लवकरच एईपीएस (Aadhaar Enabled Payment System) ही अत्याधुनिक सुविधाही कार्यान्वित करणार आहे. विशेष म्हणजे, ही अद्ययावत सुविधा देणाऱ्या राज्यातील मोजक्या तीन जिल्हा बँकांमध्ये आता रत्नागिरी बँकेचा समावेश होणार आहे.
​मागील वर्षाच्या तुलनेत बँकेने ठेवी, कर्जवाटप आणि नफ्यामध्ये केलेली ही लक्षणीय वाढ अतिशय कौतुकास्पद आहे. बँकेच्या या सुवर्णझेपेबद्दल बँकेचे अध्यक्ष कृषिभूषण डॉ. तानाजीराव चोरगे, उपाध्यक्ष बाबाजीराव जाधव आणि सर्व संचालक मंडळाने बँकेचे सभासद व ग्राहकांचे मनःपूर्वक आभार मानले आहेत. तसेच ग्राहकांनी बँकेवर दाखवलेला हा दृढ विश्वास आणि सहकार्य यापुढेही असेच कायम राहील, अशी अपेक्षा त्यांनी व्यक्त केली आहे. संचालक मंडळाने घेतलेले अचूक निर्णय आणि बँकेचे अधिकारी व कर्मचारी यांनी घेतलेली अपार मेहनत यामुळेच हे घवघवीत यश साध्य झाल्याची प्रतिक्रिया बँकेचे मुख्य कार्यकारी अधिकारी डॉ. सुधीर गिम्हवणेकर यांनी दिली. बँकेच्या या उल्लेखनीय कामगिरीबद्दल सध्या सर्वच स्तरातून त्यांचे कौतुक व अभिनंदन केले जात आहे.