admin
रत्नागिरी : प्रतिनिधी
रत्नागिरीत आज पार पडलेल्या जिल्हास्तरीय शालेय सायकलिंग स्पर्धेला विद्यार्थ्यांचा अतिशय उत्स्फूर्त प्रतिसाद मिळाला. कसोप ते कोळंबे फाटा या मार्गावर ही स्पर्धा मोठ्या उत्साहात पार पडली. जिल्हा क्रीडा परिषद, जिल्हा क्रीडा अधिकारी कार्यालय, रत्नागिरी जिल्हा सायकलिंग असोसिएशन आणि रत्नागिरी सायकलिस्ट क्लब यांच्या संयुक्त विद्यमाने या विशेष स्पर्धेचे आयोजन करण्यात आले होते. या स्पर्धेतील उत्कृष्ट कामगिरीच्या आधारावर विजेत्या सायकलपटूंची आगामी विभागीय स्तरावरील स्पर्धेसाठी निवड केली जाणार आहे.
या स्पर्धेत विविध गटांमध्ये चुरशीची लढत पाहायला मिळाली. टाइम ट्रायल प्रकारात १४ वर्षांखालील मुलांच्या गटात चिपळूणच्या युनायटेड इंग्लिश स्कूलचा शिवम आलदर याने प्रथम, तर रत्नागिरीच्या जीजीपीएस शाळेच्या अधिराज कवितके याने द्वितीय क्रमांक पटकावला. याच वयोगटातील मुलींमध्ये युनायटेड इंग्लिश स्कूलची मृणाल आलदर हिने बाजी मारली. १७ वर्षांखालील मुलांच्या गटात दापोलीच्या ज्ञानदीप विद्यामंदिरचा आयुष शिंदे प्रथम आणि वरद कदम द्वितीय ठरला, तर चिपळूणच्या आगवेकर विद्यालयाच्या ईशान वझे याने तृतीय क्रमांक मिळवला. १७ वर्षांखालील मुलींच्या गटात रत्नागिरीच्या अभ्यंकर-कुळकर्णी कनिष्ठ महाविद्यालयाची आध्या कवितके हिने प्रथम क्रमांक पटकावला. तसेच, १४ वर्षांखालील मुलांच्या ‘मास स्टार्ट’ प्रकारात जीजीपीएसचा रुद्र जाधव आणि खेडच्या एलटीटी इंग्लिश स्कूलचा दिशांत पवार यांनी अनुक्रमे प्रथम व द्वितीय क्रमांक मिळवला. याव्यतिरिक्त खेडचा स्वराज राजपूरकर आणि शिवार आंबेरे येथील श्रावणी खानविलकर यांनीही या स्पर्धेत लक्षवेधी सहभाग नोंदवला.
ही स्पर्धा यशस्वी करण्यासाठी रत्नागिरी सायकलिस्ट क्लबचे उपाध्यक्ष दर्शन जाधव यांच्यासह अनेक सदस्यांनी विशेष परिश्रम घेतले. विशाल भोसले, प्रसाद देवस्थळी, प्रसाद खेडेकर, विनायक पावसकर, प्रमोद लिंगायत, नारायण पाटोळे, हृषिकेश पुरोहित, अमित पोटफोडे, केदार देवस्थळी, उत्तम पवार, मकरंद पटवर्धन, तसेच चिपळूणचे श्रीनिवास गोखले आणि खेडचे सिद्धेश बांदिवडेकर यांनी मोलाचे सहकार्य केले. याशिवाय लक्ष्मीकेशव माध्यमिक विद्यालयाचे संस्थाध्यक्ष कमलाकर साळवी आणि सचिव सागर साळवी यांच्या मार्गदर्शनाखाली शालेय प्रशासनाने सर्वतोपरी मदत केली. सुरक्षिततेच्या दृष्टिकोनातून जिल्हा रुग्णालयातर्फे आपत्कालीन स्थितीसाठी रुग्णवाहिका आणि वाहतूक नियंत्रणासाठी वाहतूक शाखेचे दोन पोलिसही याठिकाणी तैनात करण्यात आले होते.
