admin
रत्नागिरी : जिमाका
भारत निवडणूक आयोगाच्या निर्देशानुसार राज्यात राबविल्या जाणाऱ्या ‘मतदार यादी विशेष सखोल पुनरीक्षण कार्यक्रम २०२६’ अंतर्गत दावे व हरकती दाखल करण्यासाठी आता १२ ऑक्टोबर २०२६ पर्यंत मुदतवाढ देण्यात आली आहे. यामुळे नावनोंदणी आणि दुरुस्तीपासून वंचित राहिलेल्या नागरिकांना मोठी संधी उपलब्ध झाली असून, सुधारित वेळापत्रकानुसार मतदार यादीची अंतिम प्रसिद्धी आता १६ नोव्हेंबर रोजी केली जाणार असल्याची माहिती उपजिल्हा निवडणूक अधिकारी राहुल गायकवाड यांनी दिली.
मुख्य निवडणूक अधिकारी यांच्या विनंतीवरून आयोगाने हा सुधारित कार्यक्रम जाहीर केला आहे. या मोहिमेत अधिकाधिक पात्र नागरिकांना आणि नवमतदारांना सहभागी करून घेण्यासाठी दिनांक ३, ४, १० आणि ११ ऑक्टोबर या चार दिवशी जिल्ह्यातील सर्व मतदान केंद्रांवर विशेष नोंदणी शिबिरांचे आयोजन करण्यात आले आहे. या शिबिरांच्या दिवशी मतदान केंद्रस्तरीय अधिकारी संबंधित केंद्रांवर प्रत्यक्ष उपस्थित राहून नवीन मतदार नोंदणी, प्रारूप यादीतील नावांची पडताळणी तसेच दुरुस्तीचे अर्ज स्वीकारण्याचे काम करणार आहेत. या सुधारित वेळापत्रकानुसार दावे, हरकती आणि नोटिसांचा निपटारा १० नोव्हेंबरपर्यंत पूर्ण केला जाईल.
दरम्यान, प्रारूप मतदार यादी प्रसिद्धीनंतर ज्या नागरिकांना नोंद जुळत नसल्याबाबत किंवा तांत्रिक विसंगती असल्याच्या कारणावरून सुनावणीच्या सूचना-पत्रे (नोटिसा) मिळाली आहेत, त्यांना मोठा दिलासा देण्यात आला आहे. अशा मतदारांना प्रत्यक्ष शासकीय कार्यालयात हेलपाटे मारण्याची आवश्यकता नसून, मतदान केंद्रस्तरीय अधिकारी स्वतः मतदारांच्या घरी जाऊन आवश्यक कागदपत्रे गोळा करतील. याशिवाय मतदारांना संगणकीय माध्यमातून अथवा संदेशवहन प्रणालीद्वारेही कागदपत्रे सादर करण्याची मुभा देण्यात आली आहे. केवळ अपवादात्मक स्थितीतच दूरदृश्य प्रणालीद्वारे आभासी सुनावणी घेतली जाईल आणि त्यासाठी कुटुंबातील कोणताही सज्ञान सदस्य हजर राहू शकेल. लोकशाही बळकट करण्यासाठी जिल्ह्यातील सर्व पात्र नवमतदारांनी या संधीचा लाभ घेऊन आपली नोंदणी निश्चित करावी, असे आवाहन जिल्हा प्रशासनाने केले आहे.
