admin
ठाणे : प्रतिनिधी
महाराष्ट्रातील ठाणे शहरासाठी हा अत्यंत अभिमानाचा क्षण आहे. ठाण्यातील प्रसिद्ध न्यूरोसर्जन डॉ. निलेश पोतदार यांना फिलीपिन्सची राजधानी मनिला येथे प्रतिष्ठित ‘एशियाज मॉडर्न हिरो अवॉर्ड २०२६’ ने सन्मानित करण्यात आले आहे. हा भव्य सोहळा २५ सप्टेंबर रोजी मनिला येथील ओकाडा हॉटेलमध्ये पार पडला. ईसीओपीचे अध्यक्ष डॉ. सर्जियो ऑर्टिझ-लुईस ज्युनियर आणि झेक प्रजासत्ताकचे राजदूत कॅरेल हेज्स यांच्या हस्ते त्यांना हा आंतरराष्ट्रीय सन्मान प्रदान करण्यात आला.
डॉ. पोतदार हे मर्क्युरी हॉस्पिटलचे संचालक असून गॅलेक्सी सुपरस्पेशालिटी हॉस्पिटलमध्ये न्यूरोसर्जन म्हणून आपली सेवा देत आहेत. गुंतागुंतीच्या मेंदू आणि मणक्याच्या शस्त्रक्रिया, विशेषतः ‘एंडोस्कोपिक स्पाइन सर्जरी’मध्ये त्यांनी अफाट प्राविण्य मिळवले आहे. या तंत्रात मोठ्या छेदाऐवजी एका छोट्या छिद्रातून कॅमेऱ्याच्या मदतीने अचूक शस्त्रक्रिया केली जाते. यामुळे रुग्णाला कमी वेदना होतात, रक्तस्त्राव कमीत कमी होतो आणि रुग्ण अवघ्या दोन-तीन दिवसांत चालू-फिरू लागतो. त्यांच्या याच अचूक उपचार पद्धतीसाठी त्यांना हा सन्मान मिळाला आहे. यापूर्वी २०२५ मध्येही त्यांचा देशातील टॉप १० न्यूरोसर्जनच्या यादीत समावेश करण्यात आला होता.
या यशाबद्दल बोलताना डॉ. पोतदार म्हणाले की, अचूक उपचार हेच त्यांचे मुख्य ध्येय असून त्यांनी या सन्मानाचे श्रेय आपल्या संपूर्ण टीमला दिले. ठाण्यातील लोकांना मेंदू आणि मणक्याच्या अत्याधुनिक उपचारांसाठी मुंबईला जावे लागू नये, तर त्यांना त्यांच्याच शहरात जागतिक दर्जाच्या वैद्यकीय सुविधा मिळाव्यात, हा त्यांचा मुख्य दृष्टिकोन (व्हिजन) आहे. या सन्मानामुळे वैद्यकीय क्षेत्रात ठाण्याचे नाव आंतरराष्ट्रीय स्तरावर चमकले आहे.
