admin
संगमेश्वर : प्रतिनिधी
मुंबई-गोवा राष्ट्रीय महामार्गावर संगमेश्वरनजीक वांद्री-सप्तलिंगी पुलाजवळ गुरुवारी मध्यरात्री एका भरधाव कारचा भीषण अपघात झाला. चालकाचे वाहनावरील नियंत्रण सुटल्याने कार रस्त्यालगतच्या मोठ्या दगडावर आदळून उलटली. या थरारक अपघातात कारमधील तीन प्रवासी जखमी झाले असून, सुदैवाने कोणतीही जीवितहानी झालेली नाही.
मिळालेल्या माहितीनुसार, संबंधित फॉक्सवॅगन कार मुंबईतील विक्रोळी येथून रत्नागिरीच्या दिशेने जात होती. मध्यरात्री अडीच वाजेच्या सुमारास वांद्री-सप्तलिंगी पुलाजवळ पोहोचल्यावर चालकाचा गाडीवरील ताबा सुटला. वेगात असलेली कार थेट महामार्गालगतच्या एका भल्या मोठ्या दगडावर जाऊन धडकली. ही धडक इतकी जोरदार होती की, कारचे तीन टायर जागीच फुटले. त्यानंतर गाडीचा तोल जाऊन ती रस्त्यावर उलटली आणि गरगर फिरत संगमेश्वरच्या दिशेने तोंड करून थांबली. या अपघातात गाडीचे मोठ्या प्रमाणावर नुकसान झाले आहे.
अपघाताचा मोठा आवाज ऐकताच परिसरातील स्थानिक नागरिकांनी तातडीने घटनास्थळी धाव घेतली. त्यांनी प्रसंगावधान राखून कारमध्ये अडकलेल्या जखमी प्रवाशांना सुरक्षितपणे बाहेर काढले व पुढील वैद्यकीय उपचारांसाठी मदत उपलब्ध करून दिली. अपघातग्रस्त वाहन रस्त्यावरच उलटलेले असल्याने महामार्गावरील वाहतूक काही काळ विस्कळीत झाली होती. मात्र, स्थानिक प्रशासन आणि ग्रामस्थांच्या मदतीने कार रस्त्याच्या बाजूला हटवण्यात आली आणि वाहतूक पुन्हा सुरळीत करण्यात आली. स्थानिकांच्या तत्परतेमुळे जखमींना वेळेत मदत मिळाली आणि संभाव्य मोठी जीवितहानी टळली. रात्रीच्या वेळी महामार्गावर वाहनांचा वेग मर्यादित ठेवण्याचे महत्त्व या घटनेतून पुन्हा एकदा समोर आले आहे.
