admin
देवरुख : प्रतिनिधी
सोशल मीडियावरून अज्ञात लिंक किंवा फाईल्स डाऊनलोड करणे किती धोक्याचे ठरू शकते, याचा धक्कादायक प्रकार संगमेश्वर तालुक्यातील साडवली येथे उघडकीस आला आहे. इन्स्टाग्रामवरून आलेली संशयास्पद एपीके (APK) फाईल डाऊनलोड केल्यामुळे साडवली साईनगर येथील २१ वर्षीय कौस्तुभ सोमण या तरुणाचा मोबाईल हॅक करून त्याच्या बँक खात्यातून ५५ हजार ५९९ रुपये परस्पर लांबवण्यात आले. याप्रकरणी देवरूख पोलीस ठाण्यात अज्ञात सायबर भामट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, ७ सप्टेंबर २०२६ रोजी महाविद्यालयात असताना कौस्तुभच्या इन्स्टाग्रामवर एका अनोळखी व्यक्तीकडून एपीके फाईल आली. त्याने ती फाईल डाऊनलोड केल्यानंतर त्याचा मोबाईल संशयास्पदरीत्या अचानक चार-पाच वेळा बंद पडला. दुसऱ्या दिवशी ८ सप्टेंबरला दुपारी सव्वाबाराच्या सुमारास फोन पुन्हा बंद पडला. त्यानंतर काही वेळातच त्याच्या बँक ऑफ महाराष्ट्रच्या खात्याशी लिंक असलेल्या गुगल पेवरून ५५ हजार ५९९ रुपये एका अज्ञात आरोपीच्या युपीआय आयडीवर वळते झाले.
९ सप्टेंबरला खात्यातील शिल्लक तपासल्यानंतर आपली फसवणूक झाल्याचे कौस्तुभच्या लक्षात आले. याप्रकरणी १ ऑक्टोबरला देवरूख पोलिसांत भारतीय न्याय संहिता आणि माहिती तंत्रज्ञान कायद्यान्वये गुन्हा दाखल करण्यात आला आहे. वाढत्या सायबर गुन्ह्यांच्या पार्श्वभूमीवर, नागरिकांनी अनोळखी व्यक्तीने पाठवलेल्या लिंकवर क्लिक करू नये किंवा संशयास्पद ॲप्स डाऊनलोड करू नयेत, असे आवाहन पोलिसांनी केले आहे.
