admin
नवी दिल्ली : वृत्तसंस्था
महाराष्ट्रातील कोल्हापूर येथील नांदणी मठात परत आणण्यात आलेल्या ‘माधुरी’ हत्तिणीचे प्रकरण पुन्हा एकदा सर्वोच्च न्यायालयात पोहोचले आहे. प्राण्यांच्या हक्कांसाठी काम करणारी संस्था ‘पेटा इंडिया’ने सर्वोच्च न्यायालयात याचिका दाखल करून तात्काळ हस्तक्षेपाची मागणी केली आहे. माधुरीला त्वरित पुन्हा ‘वनतारा’मध्ये हलवण्यात यावे, अशी पेटाची मागणी आहे.
याचिकेत आरोप करण्यात आला आहे की, नांदणी मठात परतलेल्या माधुरीला अजून १५ दिवसही उलटले नाहीत आणि तिची अवस्था जाड साखळदंडात अडकलेल्या एका कैद्यासारखी झाली आहे. ११-१२ सप्टेंबर रोजी जेव्हा माधुरी कोल्हापुरात परतली, तेव्हा प्रचंड आतषबाजी, ढोल-ताशांचा दणदणाट आणि कानठळ्या बसवणाऱ्या घोषणांमुळे तिला मोठा मानसिक आणि शारीरिक त्रास सहन करावा लागला होता.
पेटाच्या पॉलिसी विभागाच्या उपाध्यक्षा खुशबू गुप्ता यांनी सांगितले की, माधुरी वनतारामध्ये तिच्या इतर हत्ती मैत्रिणींसोबत मोकळ्या वातावरणात फिरण्याचा आनंद घेत होती, पण आता तिला एका शेडमध्ये एकटेच सोडण्यात आले आहे. तज्ज्ञांच्या मते, ही जागा तिच्या दीर्घ आणि निरोगी आयुष्यासाठी अजिबात अनुकूल नाही.
याचिकेत म्हटले आहे की, मठात ३३ वर्षे एकटे राहिल्यामुळे माधुरीच्या पायांना गंभीर दुखापत झाली होती आणि गुडघ्यांना सूज आली होती, ज्यामुळे तिला डांबरी रस्त्यावर चालणे आणि तासनतास उभे राहणे असह्य झाले होते. याच उपचारासाठी आणि योग्य काळजी घेण्यासाठी तिला वनताराला पाठवण्यात आले होते. माधुरीला पुन्हा मठात आणणे हे बॉम्बे हायकोर्ट (१६ जुलै) आणि सर्वोच्च न्यायालयाच्या (२८ जुलै) पूर्वीच्या आदेशांचे उघड उल्लंघन असल्याचा पेटाचा दावा आहे. आता सर्वोच्च न्यायालयाचा आगामी निर्णयच या मुक्या प्राण्याचे भविष्य ठरवेल.
