admin
रत्नागिरी : प्रतिनिधी
रत्नागिरी जिल्ह्यात उध्दव ठाकरेंच्या शिवसेनेला दिवसागणिक धक्के बसत आहेत. एकेकाचे निष्ठावंत हळू हळू ठाकरेंची साथ सोडत आहेतच. मात्र राजकीय वैमनस्यामुळे का होईना ठाकरेंच्या सेनेत टिकून राहिलेले देखील आता राजकीय वैर संपवून एकत्र येत असल्याचे पहायला मिळत आहे.
माजी मंत्री व शिवसेनेचे नेते रामदास भाई कदम याचे कट्टर विरोधक असलेले संजय कदम आता लवकरच शिवसेनेत प्रवेश करणार असल्याचे वृत्त आहे. काही दिवसांपूर्वी दोन्ही नेत्यांची भेट झाल्याची चर्चा सुरू आहे. मात्र संजय कदम यांच्या प्रवेशापूर्वीच सावध भूमिका घेत शिवसेना उबाठापक्षातून त्यांची हकालपट्टी करण्यात आली आहे. तसे पत्रक सेना भवनातून प्रसिद्धीस देण्यात आले आहे.
शिवसेना उबाठा पक्षाकडून जारी करण्यात आलेल्या पत्रकात म्हटले आहे की, जिल्हाप्रमुख संजय वसंत कदम यांची शिवसेना (उद्धव बाळासाहेब ठाकरे) पक्षातून पक्षविरोधी कारवाया केल्यामुळे हकालपट्टी करण्यात येत आहे.
रत्नागिरी (खेड, गुहागर, दापोली, मंडणगड) जिल्ह्याचे जिल्हाप्रमुख संजय वसंत कदम यांनी पक्षविरोधी कारवाया केल्यामुळे माननीय शिवसेना (उद्धव बाळासाहेब ठाकरे) पक्षप्रमुख श्री. उध्दवजी ठाकरे यांच्या आदेशाने शिवसेना (उद्धव बाळासाहेब ठाकरे) पक्षातून हकालपट्टी करण्यात आली आहे.
अशी माहिती शिवसेना (उद्धव बाळासाहेब ठाकरे) मध्यवर्ती कार्यालयातून प्रसिद्धीस देण्यात आलेल्या पत्रकाद्वारे कळविण्यात आली आहे.
