admin
रत्नागिरी : प्रतिनिधी
जिल्ह्यातील विस्तीर्ण आणि निसर्गरम्य समुद्रकिनाऱ्यांवर पर्यटकांच्या सुरक्षेसाठी आता आधुनिक तंत्रज्ञानाचे मजबूत कवच मिळाले आहे. समुद्रात बुडणाऱ्या नागरिकांचे प्राण तत्काळ वाचवण्यासाठी ५ अत्याधुनिक ‘लाईफ सेव्हिंग रोबोटिक वॉटर क्राफ्ट’ (Life Saving Robotic Water Craft) आज जिल्ह्याचे पालकमंत्री डॉ. उदय सामंत यांच्या हस्ते रत्नागिरी पोलीस दलाकडे सुपूर्द करण्यात आले. जिल्हा नियोजन समितीच्या (DPC) नाविन्यपूर्ण योजनेअंतर्गत ही यंत्रणा उपलब्ध करून देण्यात आली आहे.
रत्नागिरीच्या किनाऱ्यांवर दरवर्षी लाखो पर्यटक येतात. मात्र, पाण्याचा आणि लाटांचा अचूक अंदाज न आल्याने गेल्या पाच वर्षांत तब्बल १४३ पर्यटकांचा आणि नागरिकांचा बुडून दुर्दैवी मृत्यू झाला आहे. ही गंभीर बाब लक्षात घेऊन प्रशासनाने हे हायटेक रोबोटिक वॉटर क्राफ्ट्स यंत्रणेत समाविष्ट केले आहेत. समुद्रातील प्रचंड लाटा आणि प्रतिकूल हवामानातही हे रोबोट्स संकटात सापडलेल्या व्यक्तीपर्यंत अतिशय वेगाने पोहोचून त्यांचे प्राण वाचवू शकतील. यामुळे पोलिसांचे बचावकार्य अधिक गतिमान आणि प्रभावी होणार आहे.
हे अत्याधुनिक रोबोट्स पर्यटकांची सर्वाधिक गर्दी असणाऱ्या गणपतीपुळे, दापोलीतील मुरुड-लाडघर, गुहागर आणि आरे-वारे या प्रमुख किनाऱ्यांवर तैनात केले जाणार आहेत. या हस्तांतरण सोहळ्याला आमदार शेखर निकम, जिल्हाधिकारी मनुज जिंदल, पोलीस अधीक्षक नितीन बगाटे यांच्यासह महसूल व पोलीस प्रशासनाचे वरिष्ठ अधिकारी उपस्थित होते. या नव्या यंत्रणेमुळे किनाऱ्यांवरील दुर्घटनांना मोठा आळा बसेल असा विश्वास व्यक्त केला जात आहे.
