admin
रत्नागिरी : प्रतिनिधी
तालुका आणि जिल्हा स्तरावर आपल्या कुस्तीचे निर्विवाद वर्चस्व गाजवल्यानंतर हरचिरी (ता. रत्नागिरी) येथील युवा मल्ल राजवीर सतीश पोवार याने आता थेट राज्यस्तरावर धडक मारली आहे. सातारा येथे नुकत्याच पार पडलेल्या विभागस्तरीय शालेय कुस्ती स्पर्धेत १४ वर्षांखालील ३८ किलो वजनी गटात राजवीरने अद्वितीय कौशल्य दाखवत राज्यस्तरीय स्पर्धेचे तिकीट पक्के केले आहे. त्याच्या या घवघवीत यशामुळे रत्नागिरी जिल्ह्याच्या क्रीडा क्षेत्रात आनंदाचे वातावरण पसरले आहे.
हरचिरी-उमरे येथील महात्मा गांधी दुय्यम शिक्षण मंदिराचा विद्यार्थी असलेल्या राजवीरसमोर विभागस्तरीय स्पर्धेत कोल्हापूर विभागातील मातब्बर मल्लांचे मोठे आव्हान होते. मात्र, अत्यंत अटीतटीच्या झालेल्या या लढतींमध्ये राजवीरने आपल्या चपळ हालचाली, अचूक पकड आणि प्रभावी डावपेचांच्या जोरावर प्रतिस्पर्ध्यांना आस्मान दाखवले. कुस्तीच्या फडात त्याने दाखवलेला कमालीचा संयम आणि आक्रमक पवित्र्यामुळे उपस्थित क्रीडाप्रेमींसह पंचांनीही त्याचे तोंडभरून कौतुक केले.
राजवीरच्या या यशामागे त्याची प्रचंड जिद्द, नियमित सराव आणि शाळेचे क्रीडा शिक्षक मारुती गलांडे यांचे मोलाचे मार्गदर्शन आहे. गलांडे सरांनी राजवीरमधील कौशल्य अचूक हेरून त्याच्याकडून कसून तांत्रिक तयारी व रणनीतीची आखणी करून घेतली. या देदीप्यमान यशाबद्दल शिक्षण संस्थेचे पदाधिकारी, मुख्याध्यापक, सर्व शिक्षक, शिक्षकेतर कर्मचारी आणि हरचिरी ग्रामस्थांकडून राजवीर व त्याच्या मार्गदर्शकांचे उत्स्फूर्त अभिनंदन केले जात आहे. आगामी राज्यस्तरीय स्पर्धेसाठीही त्याला सर्व स्तरांतून भरभरून शुभेच्छा दिल्या जात आहेत.
