admin
रत्नागिरी : प्रतिनिधी
येथील मध्यवर्ती बस स्थानकावर सुरू असलेल्या एनसीएमसी (NCMC) स्मार्ट कार्ड नोंदणी आणि वाटप प्रक्रियेचा पुरता बोजवारा उडाला आहे. वारंवार डाऊन होणारा सर्व्हर आणि प्रशासनाच्या अत्यंत संथ कारभारामुळे प्रवाशांना नाहक मनस्ताप सहन करावा लागत आहे. नोंदणी करून महिना उलटला तरी कार्ड हातात पडत नसल्याने, विशेषतः ज्येष्ठ नागरिकांमधून तीव्र संताप व्यक्त होत आहे.
स्थानिक नागरिक उज्ज्वला गुप्ते यांनी या ढिसाळ कारभाराबाबत तीव्र नाराजी व्यक्त केली. महिनाभरापूर्वी नोंदणी करूनही त्यांना अद्याप कार्ड मिळालेले नाही. संबंधित केंद्रावर गेल्यावर कार्ड ॲक्टिव्हेट होत नसल्याचे सांगण्यात आले. मंगळवारी सकाळी १० वाजल्यापासून रांगेत उभे राहूनही दुपारी दीड वाजेपर्यंत त्यांचा नंबर आला नाही. त्यातच कर्मचारी जेवणाच्या सुट्टीवर गेल्यामुळे रांगेतील नागरिकांना तासनतास हताशपणे वाट पाहत उभे राहावे लागले.
अशीच काहीशी कैफियत मानसी वैद्य यांनी मांडली. गेल्या महिनाभरापासून त्या कार्डसाठी चकरा मारत असून, सर्व्हर डाऊन असल्याचे कारण सांगून त्यांना अनेकदा माघारी पाठवण्यात आले. सध्या या केंद्रावर नागरिक पहाटे ६ वाजल्यापासून रांगेत उभे राहत आहेत. तासनतास ताटकळत राहावे लागत असल्याने वयोवृद्धांना मोठा शारीरिक त्रास सहन करावा लागत आहे.
प्रशासनाच्या या अनागोंदी कारभारामुळे नागरिकांचा मौल्यवान वेळ वाया जात आहे. या समस्येवर तोडगा काढण्यासाठी प्रशासनाने तांत्रिक त्रुटी तातडीने दूर कराव्यात तसेच गर्दीच्या वेळेत अतिरिक्त कर्मचाऱ्यांची नियुक्ती करून ही प्रक्रिया जलद आणि सुलभ करावी, अशी जोरदार मागणी संतप्त प्रवाशांकडून केली जात आहे.
