admin
रत्नागिरी : प्रतिनिधी
चालू ऑक्टोबर महिन्यातील तीव्र उकाड्याने नागरिक अगोदरच हैराण झालेले असताना, सोमवारी सकाळच्या सुमारास देखभालीचे कारण पुढे करत नाचणे परिसरातील वीजपुरवठा अचानक खंडित करण्यात आला. ऐन सकाळी कामावर निघण्याच्या आणि घरकामाच्या गडबडीच्या वेळेतच तासन्तास वीज गायब झाल्याने स्थानिक नागरिकांमधून महावितरणच्या या मनमानी कारभाराविरोधात तीव्र संताप व्यक्त होत आहे.
वाढत्या तापमानामुळे विशेषतः लहान मुले आणि ज्येष्ठ नागरिकांना असह्य उष्णतेचा मोठा त्रास सहन करावा लागला. वीजपुरवठा बंद झाल्याने घरातील पंखे व थंडावा देणारी उपकरणे बंद पडली, तसेच नळपाणी पुरवठ्यावरही याचा थेट परिणाम झाला. सकाळी ९ च्या सुमारास नागरिक नोकरी, उद्योग आणि दैनंदिन व्यवहारांसाठी घराबाहेर पडण्याच्या तयारीत असतानाच ही समस्या उद्भवल्याने सर्वांचीच मोठी तारांबळ उडाली.
तांत्रिक यंत्रणेच्या देखभालीसाठी वीज बंद ठेवणे गरजेचे असले, तरी कामांचे सुनियोजन करून वीजग्राहकांना आधी पूर्वसूचना देणे महावितरणचे कर्तव्य होते, अशी संतप्त भावना नागरिकांनी व्यक्त केली आहे. उष्णतेचा प्रकोप पाहता नागरिकांच्या आरोग्याची हेळसांड रोखण्यासाठी महावितरणच्या वरिष्ठ अधिकाऱ्यांनी स्थानिक उपकेंद्रांना सक्त निर्देश द्यावेत; तसेच कामे करताना वीज कमीत कमी वेळ बंद राहील आणि पर्यायी व्यवस्था केली जाईल याकडे लक्ष द्यावे, अशी जोरदार मागणी आता होत आहे.
