admin
मुंबई:
महाराष्ट्रातील स्पर्धा आणि नोकरभरती परीक्षांची प्रणाली अधिक पारदर्शक, विश्वासार्ह व प्रभावी बनवण्यासाठी परीक्षार्थींच्या भावना आणि सूचनांचा सकारात्मक विचार करून ठोस उपाययोजना केल्या जातील, अशी ग्वाही भरती परीक्षा सुधारणा उच्चस्तरीय टास्क फोर्सच्या अध्यक्षा तथा सामान्य प्रशासन विभागाच्या अतिरिक्त मुख्य सचिव व्ही. राधा यांनी दिली. मुंबई उपनगर जिल्हाधिकारी कार्यालयात आयोजित विशेष बैठकीत या टास्क फोर्सने कोकण विभागातील विद्यार्थ्यांशी आणि परीक्षार्थींशी थेट संवाद साधून त्यांच्या अडचणी समजून घेतल्या.
यापूर्वी टास्क फोर्सने पुणे, नागपूर, अमरावती आणि छत्रपती संभाजीनगर येथेही विद्यार्थ्यांशी संवाद साधला आहे. या संपूर्ण मोहिमेदरम्यान आतापर्यंत सुमारे १,५०० विद्यार्थ्यांशी प्रत्यक्ष चर्चा झाली असून, ईमेलद्वारे तब्बल ३० हजार सुधारणाविषयक सूचना प्राप्त झाल्या आहेत. या संवादादरम्यान विद्यार्थ्यांनी परीक्षा प्रक्रियेतील अनावश्यक विलंब टाळणे, प्रलंबित परीक्षा तातडीने घेणे, ‘एकल नोंदणी व एकल शुल्क’ (वन-टाइम रजिस्ट्रेशन) पद्धत लागू करणे, परीक्षा पद्धतीतील संभाव्य बदलांची पूर्वकल्पना देणे तसेच उत्तरतालिका (आन्सर की) व मूल्यमापन प्रक्रिया पूर्णपणे पारदर्शक ठेवणे यांसारखे महत्त्वाचे मुद्दे मांडले.
विद्यार्थ्यांच्या अडचणींवर बोलताना अतिरिक्त मुख्य सचिव व्ही. राधा यांनी स्पष्ट केले की, संघ लोकसेवा आयोग (UPSC) आणि इतर राज्यांमधील यशस्वी भरती प्रक्रियांचा अभ्यास करून व्यवस्थेतील त्रुटी दूर केल्या जातील. ही समिती केवळ कागदी शिफारशींपुरती मर्यादित न राहता प्रत्यक्ष जमिनीवरील अडचणी सोडवण्यावर लक्ष केंद्रित करेल. या बैठकीस उच्चस्तरीय समितीचे सदस्य तथा माहिती तंत्रज्ञान विभागाचे सचिव वीरेंद्र सिंह, यूपीएससीचे माजी सदस्य एअर मार्शल अजित भोसले (निवृत्त), आयआयटी मुंबईचे प्रा. श्यामप्रसाद करगड्डे, कोकण विभागीय आयुक्त रुबल अग्रवाल आणि मुंबई उपनगरचे जिल्हाधिकारी सौरभ कटियार उपस्थित होते.
