admin
मुंबई (प्रतिनिधी):
भाजपला ज्या प्रकारे मतदारसंघांची पुनर्रचना (Delimitation) करायची आहे, ते लोकशाहीसाठी अत्यंत घातक आहे. विरोधी पक्षाचे आमदार आणि खासदार निवडूनच येऊ नयेत, अशा पद्धतीने मतदारसंघ फोडण्याचे कारस्थान सुरू असल्याचा खळबळजनक आरोप शिवसेना (उद्धव बाळासाहेब ठाकरे) नेते आणि खासदार संजय राऊत यांनी केला आहे.
मुंबईत आयोजित पत्रकार परिषदेत बोलताना राऊत यांनी भाजपवर जोरदार टीका केली. ते म्हणाले की, “भाजपचे प्रत्येक पाऊल हे त्यांच्या वैयक्तिक स्वार्थासाठी असते. निवडणूक आयोग सध्या भाजपच्या ताटाखालचे मांजर झाले असून, त्यांच्या मदतीने मतदारसंघ तोडण्याचे आणि फोडण्याचे काम अंदाधुंद पद्धतीने केले जाणार आहे.”
राऊत यांनी मांडलेले महत्त्वाचे मुद्दे:
-
विरोधी पक्षांची रणनीती: या संदर्भात १५ एप्रिल रोजी विरोधी पक्षांची महत्त्वपूर्ण बैठक होणार आहे. त्यापूर्वी शिवसेना पक्षप्रमुख उद्धव ठाकरे यांच्याशी चर्चा केली जाईल.
-
समितीची मागणी: मतदारसंघांची पुनर्रचना ही भाजपच्या सोयीनुसार होऊ नये. यासाठी सर्वपक्षीय चर्चा झाली पाहिजे आणि एक विशेष समिती नेमली गेली पाहिजे, असे राऊत यांनी ठणकावून सांगितले.
-
महिला आरक्षण: महिला आरक्षणावरून सुरू असलेल्या राजकारणावरही त्यांनी भाष्य केले. पंतप्रधान मोदी स्वतःला याचे ‘मसीहा’ समजतात, मात्र महाराष्ट्रात सर्वात आधी शरद पवार यांनी महिला आरक्षण सुरू केले होते, याची आठवण त्यांनी करून दिली.
भाजपला हवे तसे डॉक्युमेंट्स तयार झाले असले तरी, आम्ही हे कारस्थान यशस्वी होऊ देणार नाही, असा इशाराही संजय राऊत यांनी यावेळी दिला.
