admin
ठाणे : प्रतिनिधी
मानपाडा परिसरातील शिवसेना (ठाकरे गट) विभागप्रमुख प्रदीप ऊर्फ बाळू पूर्णेकर यांच्या हत्येप्रकरणी शिवसेना नेते आणि आमदार भास्कर जाधव यांनी अत्यंत खळबळजनक आरोप केला आहे. येथील स्थानिक नगरसेविकेचा जातीचा दाखला बोगस असल्याचा पाठपुरावा पूर्णेकर करत होते. त्यामुळे नगरसेवक पद रद्द होईल, याच भीतीने त्यांचा काटा काढण्यात आला का? असा थेट सवाल भास्कर जाधव यांनी उपस्थित केला आहे. ‘लोकशाहीचा खून म्हणतात तो हाच आहे,’ असा संतप्त घणाघातही त्यांनी यावेळी केला.
मनोरमानगर येथील गणेशनगरात दिवंगत प्रदीप पूर्णेकर यांना श्रद्धांजली वाहण्यासाठी एका विशेष सभेचे आयोजन करण्यात आले होते. या सभेत बोलताना भास्कर जाधव यांनी ठाण्यात वाढलेली राजकीय दहशत आणि ढासळलेल्या कायदा-सुव्यवस्थेवर तीव्र संताप व्यक्त केला. ते म्हणाले की, प्रदीप पूर्णेकर हे मनोरमानगरातील तब्बल १७० एकर जमिनीवर लादल्या जाणाऱ्या मनमानी क्लस्टर योजनेला कडाडून विरोध करत होते आणि स्थानिक नागरिकांच्या हक्कासाठी संघर्ष करत होते. तसेच, तरुण पिढीला व्यसनाधीनतेपासून वाचवण्यासाठी त्यांनी ड्रग्जविरोधी मोहीमही उघडली होती. यासोबतच, स्थानिक नगरसेविकेचे जातप्रमाणपत्र महाराष्ट्राबाहेरचे आणि संशयास्पद असल्याने त्याविरोधात त्यांनी कायदेशीर लढा पुकारला होता. या सर्व प्रश्नांना पुराव्यानिशी आणि कायद्याने उत्तर देण्याऐवजी जर त्यांचा थेट काटाच काढण्यात आला असेल, तर हा सरकारला लागलेला सर्वात मोठा कलंक आहे, असे जाधव म्हणाले.
राज्यातील कायदा व सुव्यवस्थेवरून त्यांनी राज्याचे गृहमंत्री देवेंद्र फडणवीस यांच्यावरही जोरदार निशाणा साधला. ‘गुन्हेगार पाताळात लपला तरी शोधून काढीन, कोणालाही सोडणार नाही,’ अशा केवळ वल्गना केल्या जातात; मात्र मुख्यमंत्र्यांकडे गेली दहा वर्षे गृहखाते राहूनही राज्याला स्वतंत्र गृहमंत्री नाही आणि पोलिसांचा दरारा पूर्णपणे संपला आहे, अशी बोचरी टीका जाधव यांनी केली.
या श्रद्धांजली सभेला शिवसेना नेते राजन विचारे, ठाणे जिल्हाप्रमुख केदार दिघे, शहरप्रमुख अनिश गाढवे यांच्यासह दिवंगत पूर्णेकर यांच्या पत्नी वैजयंती, मुलगा राम, भाऊ जयनाथ आणि परिसरातील अनेक नागरिक, पदाधिकारी व शिवसैनिक मोठ्या संख्येने उपस्थित होते.
