admin
चिपळूण:
कुटुंबातील कर्त्या व्यक्तीच्या निधनानंतर शासकीय कार्यालयांत वारस नोंदीसाठी होणारी वारसांची धावपळ आता कायमची थांबणार आहे. ‘सेवा संकल्प अभियाना’अंतर्गत वारस नोंदणी आणि विविध शासकीय योजनांचे लाभ एकाच छताखाली उपलब्ध करून देणाऱ्या ‘वारससेतू’ या एकात्मिक ऑनलाइन पोर्टलचे चिपळुणात आमदार शेखर निकम यांच्या हस्ते नुकतेच लोकार्पण करण्यात आले. प्रशासकीय पारदर्शकता आणि गतिमानतेचे उत्तम उदाहरण असलेली ही प्रणाली प्रांताधिकारी आकाश लिगाडे यांच्या मार्गदर्शनाखाली चिपळूण व गुहागर तहसील कार्यालयांच्या कार्यक्षेत्रात सध्या प्रायोगिक तत्त्वावर कार्यान्वित करण्यात आली आहे.
यापूर्वी ग्रामपंचायतीत मृत्यूची नोंद झाल्यानंतर महसूल, कृषी, अन्न व नागरी पुरवठा किंवा सामाजिक न्याय विभागापर्यंत माहिती पोहोचण्यास मोठा प्रशासकीय विलंब होत असे. यामुळे योजनांचे लाभ मिळण्यात तांत्रिक अडचणी येत असत. आता ‘वारससेतू’ पोर्टलमुळे मृत्यूची नोंद होताच ती डिजिटल माध्यमातून तत्काळ सर्व संबंधित शासकीय कार्यालयांपर्यंत पोहोचेल. परिणामी, जमीन महसूल संहितेनुसार वारस फेरफार नोंद करणे आणि मालमत्ता वारसांच्या नावे हस्तांतरित करण्याची प्रक्रिया अत्यंत वेगवान होईल.
या गतिमान प्रणालीमुळे कृषी विभागाच्या ‘पीएम-किसान’ योजनेचा लाभ थेट पात्र वारसांच्या नावे हस्तांतरित करणे, शिधापत्रिकेतून मृत व्यक्तीचे नाव कमी करून वारसाचे नाव समाविष्ट करणे आणि सामाजिक न्याय विभागाच्या विविध पेन्शन व राष्ट्रीय कुटुंब लाभ योजनांचे फायदे कायदेशीर वारसांना विनाविलंब मिळणे शक्य होणार आहे. नागरिकांना प्रत्येक टेबलावर वेगळे अर्ज आणि कागदपत्रे देण्याच्या त्रासातून कायमची मुक्ती देणारा हा अभिनव उपक्रम सर्वसामान्यांसाठी मोठा दिलासा ठरणार आहे.
