admin
रत्नागिरी : प्रतिनिधी
येथील शासकीय वैद्यकीय महाविद्यालयात नुकतेच २४ वे मरणोत्तर देहदान पार पडले. काळबादेवी येथील ८३ वर्षीय ज्येष्ठ नागरिक दिवंगत तुकाराम शंकर बनप यांचे अल्पशा आजाराने निधन झाले. त्यांच्या पूर्वइच्छेनुसार आणि कुटुंबीयांच्या सहकार्याने त्यांचा देह वैद्यकीय विद्यार्थ्यांच्या अभ्यासासाठी महाविद्यालयाकडे सुपूर्द करण्यात आला.
तुकाराम बनप यांनी २९ जानेवारी २०२५ रोजी देहदानाचे इच्छापत्र दिले होते. ५ ऑक्टोबर २०२६ रोजी त्यांचे निधन झाल्यानंतर कुटुंबीयांनी दुसऱ्याच दिवशी देहदानाची प्रक्रिया पूर्ण केली. दिवंगत बनप यांनी बसणी येथील शाळेत मुख्य लिपिक म्हणून प्रदीर्घ काळ सेवा बजावली होती. काळबादेवी गावात सामाजिक सलोखा टिकवण्यात आणि निस्वार्थी समाजकार्यात त्यांचा मोठा वाटा होता.
विशेष म्हणजे, दिवंगत बनप यांची नात कु. पायल हिने नुकतेच बीएचएमएस (BHMS) चे शिक्षण पूर्ण केले आहे. नात वैद्यकीय क्षेत्रात पदार्पण करत असतानाच, आजोबांनी भावी डॉक्टरांच्या शिक्षणासाठी देहदान केल्याने या कुटुंबाचे वैद्यकीय क्षेत्राशी प्रेरणादायी ऋणानुबंध जोडले गेले आहेत. याप्रसंगी बनप कुटुंबीय, बसणी पंचक्रोशी शिक्षण संस्थेचे पदाधिकारी आणि काळबादेवीतील ग्रामस्थांनी उपस्थित राहून दिवंगत बनप यांना भावपूर्ण श्रद्धांजली वाहिली.
