admin
चिपळूण : प्रतिनिधी
मतदार यादीतील ‘एसआयआर’ (SIR) प्रक्रियेतील कथित अनियमिततेच्या निषेधार्थ महाविकास आघाडीच्या वतीने मंगळवारी चिपळूण शहरात मोर्चा काढण्यात आला. शिवसेना (उद्धव बाळासाहेब ठाकरे) पक्षाचे नेते आमदार भास्कर जाधव यांच्या नेतृत्वाखाली काढण्यात आलेल्या या मोर्चात महाविकास आघाडीचे पदाधिकारी आणि कार्यकर्ते मोठ्या संख्येने सहभागी झाले होते. यावेळी निवडणूक यंत्रणेच्या कार्यपद्धतीवर आक्षेप घेत आंदोलकांनी घोषणाबाजी केली.
आंदोलनाची सुरुवात सकाळी छत्रपती शिवाजी महाराज यांच्या पुतळ्यास अभिवादन करून झाली. यावेळी आयोजित जाहीर सभेत बोलताना आमदार भास्कर जाधव यांनी निवडणूक यंत्रणेच्या भूमिकेवर प्रश्नचिन्ह उपस्थित केले. मतदार नोंदणी व यादीतील बदलांच्या माध्यमातून विरोधकांना पद्धतशीरपणे लक्ष्य केले जात असल्याचा आणि लोकशाही मूल्यांची पायमल्ली होत असल्याचा आरोप त्यांनी यावेळी केला.
सभेला संबोधित केल्यानंतर हा मोर्चा चिंचनाका मार्गे प्रांत कार्यालयावर धडकला. याठिकाणी आमदार भास्कर जाधव यांच्या नेतृत्वाखालील शिष्टमंडळाने प्रांताधिकाऱ्यांची भेट घेऊन त्यांना आपल्या मागण्यांचे सविस्तर निवेदन दिले. निवडणूक प्रक्रिया पूर्णपणे पारदर्शक आणि निःपक्षपातीपणे राबवण्यात यावी, अशी मागणी या निवेदनाद्वारे करण्यात आली. या मोर्चाच्या पार्श्वभूमीवर शहरात कोणताही अनुचित प्रकार घडू नये यासाठी पोलीस प्रशासनाकडून संपूर्ण मार्गावर चोख बंदोबस्त ठेवण्यात आला होता.
