admin
मुंबई : प्रतिनिधी
शिवसेना (उद्धव बाळासाहेब ठाकरे) नेते आणि खासदार संजय राऊत यांनी जंतरमंतरवरील विद्यार्थी आंदोलनावर झालेल्या कारवाईच्या मुद्द्यावरून केंद्रीय गृहमंत्री अमित शहा यांच्यावर सडकून टीका केली आहे. दिल्लीतील जंतरमंतरवर आंदोलनकर्त्या विद्यार्थ्यांवर झालेला लाठीचार्ज, अश्रुधूर आणि पॅलेट गनच्या वापराबाबत भाष्य करताना राऊत म्हणाले की, दिल्ली हा केंद्रशासित प्रदेश आहे, त्यामुळे तेथील पोलिसांचे नियंत्रण थेट गृहमंत्र्यांच्या हातात असते. संसद मार्ग पोलीस ठाण्याच्या जनरल डायरीमध्ये पॅलेट गन वापरण्याचे आदेश देणाऱ्या डीसीपींचा स्पष्ट उल्लेख आहे. त्यामुळे विद्यार्थ्यांवर झालेला हा हल्ला अमित शहा यांच्याच आदेशाने झाला असून राहुल गांधींनी त्यांच्या राजीनाम्याची केलेली मागणी ही संपूर्ण देशाची भावना आहे.
संजय राऊत पुढे म्हणाले, ‘जालियनवाला बाग हत्याकांडात आम्ही जनरल डायर पाहिला होता, आणि जंतरमंतरवर आम्हाला जनरल कायर पाहायला मिळाला.’ ते म्हणाले की, जर अमित शहा यांनी हा आदेश दिला असेल, तर त्यांनी विद्यार्थ्यांवर गोळ्या झाडून त्यांना मारण्याचा प्रयत्न केला; आणि जर हे त्यांच्या नकळत झाले असेल, तर याचा अर्थ पोलीस गृहमंत्र्यांचे ऐकत नाहीत असा होतो. दोन्ही परिस्थितींमध्ये गृहमंत्री म्हणून अमित शहा अक्षम आणि दोषी ठरतात. राऊत यांच्या म्हणण्यानुसार, पुलवामा आणि पहलगाम हल्ल्याच्या वेळीच अमित शहा यांची जबाबदारी निश्चित करून त्यांना पदावरून हटवायला हवे होते, परंतु राष्ट्रीय सुरक्षा आणि लष्कराचा मुद्दा असल्याने विरोधकांनी तो मुद्दा जास्त ताणला नाही; पण आता या सर्व गोष्टींचा परिणाम अमित शहा यांना भोगावाच लागेल.
यासोबतच, लोकसभेत बोलताना पंतप्रधान कार्यालयाचे राज्यमंत्री जितेंद्र सिंह यांनी कोणत्याही विद्यार्थ्यावर गोळी झाडली नसल्याचे म्हटल्याबद्दल संजय राऊत यांनी त्यांच्यावर धादांत खोटे बोलत असल्याचा आरोप केला. त्यांनी टोला लगावताना म्हटले की, जितेंद्र सिंह केवळ लिहून दिलेली स्क्रिप्ट (पटकथा) वाचतात. राऊत म्हणाले की, अनेक पीडित विद्यार्थी आता समोर आले आहेत आणि संसद मार्ग पोलीस ठाण्याची जनरल डायरी कधीही खोटी असू शकत नाही. येणाऱ्या काळात त्या डायरीची पानेही जगासमोर आणली जातील, असा इशाराही त्यांनी दिला.
