admin
मुंबई: राष्ट्रवादी काँग्रेस (अजित पवार गट) पक्षाने आपली नवीन राष्ट्रीय कार्यकारिणी जाहीर केली असून यामध्ये अनेक मोठे फेरबदल पाहायला मिळत आहेत. या नव्या निवडींमध्ये प्रामुख्याने युवा नेतृत्वावर विश्वास दाखवण्यात आला असून पार्थ पवार यांची ‘राष्ट्रीय सरचिटणीस’ तर जय पवार यांची ‘राष्ट्रीय सचिव’ पदी वर्णी लागली आहे. मात्र, धक्कादायक बाब म्हणजे पक्षाच्या या नव्या यादीत प्रफुल्ल पटेल, सुनील तटकरे आणि छगन भुजबळ यांसारख्या ज्येष्ठ नेत्यांच्या नावांचा समावेश नसल्याने राजकीय वर्तुळात मोठी खळबळ उडाली आहे. ज्येष्ठ नेत्यांना डावलून नव्या दमाच्या नेत्यांना झुकते माप दिल्यामुळे पक्षात अंतर्गत बदलांचे संकेत मिळत असल्याची चर्चा सुरू झाली आहे. या सर्व वादावर पक्षाच्या प्रमुख सुनेत्रा पवार यांनी तात्काळ भूमिका स्पष्ट केली असून, जाहीर करण्यात आलेल्या यादीत काही तांत्रिक चुका (Clerical Mistakes) झाल्या असल्याचे त्यांनी सांगितले आहे. या तांत्रिक चुकांमुळे काही नावे राहून गेली असून, लवकरच सुधारित यादी प्रसिद्ध केली जाईल असे आश्वासन त्यांनी दिले आहे. आगामी निवडणुकांच्या पार्श्वभूमीवर पक्षाची ही नवी बांधणी अत्यंत महत्त्वाची मानली जात आहे.
