admin
रत्नागिरी : प्रतिनिधी
रत्नागिरी तालुक्यातील गोळप-मानेवाडी येथे २०२१ मध्ये झालेल्या भीषण भूस्खलन घटनेला पाच वर्षे उलटूनही येथील आपत्तीग्रस्तांना अद्याप कोणतीही ठोस शासकीय मदत किंवा कायमस्वरूपी पुनर्वसन मिळालेले नाही. प्रशासनाच्या या वेळकाढू धोरणाविरोधात आता शिवसेना (उद्धव बाळासाहेब ठाकरे) पक्षाच्या युवासेनेने आक्रमक पवित्रा घेतला असून जिल्हाधिकाऱ्यांना तातडीच्या उपाययोजनांसाठी निवेदन सादर केले आहे.
युवासेना जिल्हा युवाधिकारी प्रसाद सावंत यांच्या नेतृत्वाखाली पदाधिकाऱ्यांनी नुकताच या परिसराचा प्रत्यक्ष पाहणी दौरा केला. या दौऱ्यात पाच वर्षांनंतरही येथील नागरिकांची परिस्थिती भीषण असल्याचे समोर आले असून ग्रामस्थ आजही दरवर्षी पावसाळ्यात जिवाच्या भीतीने आणि आर्थिक विवंचनेत जगत आहेत. तांत्रिक कारणांमुळे बाधितांची हक्काची मदत सरकारी दरबारी अडकून पडली असून ती तात्काळ त्यांच्या बँक खात्यावर जमा करावी, अशी मागणी युवासेनेने केली आहे.
यासोबतच भूस्खलन प्रवण क्षेत्रात राहणाऱ्या कुटुंबांचे सुरक्षित ठिकाणी तातडीने पुनर्वसन करावे आणि भविष्यातील धोका टाळण्यासाठी डोंगराच्या पायथ्याशी भक्कम संरक्षण भिंत उभारावी, असेही निवेदनात नमूद करण्यात आले आहे. २०२१ ची घटना अत्यंत गंभीर असतानाही प्रशासनाने दाखवलेली उदासीनता ही दुर्दैवी असून, या संवेदनशील विषयावर तात्काळ कार्यवाही न झाल्यास अधिक तीव्र पावले उचलली जातील, असा इशारा प्रसाद सावंत यांनी दिला. या प्रसंगी उपतालुका युवाधिकारी रितेश लोखंडे यांच्यासह युवासेनेचे अनेक कार्यकर्ते उपस्थित होते.
