admin
नागपूर :
एमपीएससी पेपरफुटी प्रकरणावरून सुरू असलेल्या विद्यार्थ्यांच्या आंदोलनादरम्यानच, महाज्योती आणि वणार्तीच्या पूर्व-प्रशिक्षण निवड परीक्षेलाही तांत्रिक अडचणींचा सामना करावा लागला आहे. पुणे आणि नांदेडमधील दोन केंद्रांवर तांत्रिक बिघाडामुळे परीक्षा रद्द करण्यात आली आहे. आता या दोन्ही केंद्रांवरील सुमारे ३०० बाधित विद्यार्थ्यांसाठी १० ऑक्टोबर रोजी पुन्हा परीक्षा घेतली जाणार आहे.
महात्मा ज्योतिबा फुले संशोधन आणि प्रशिक्षण संस्था (महाज्योती) आणि वसंतराव नाईक संशोधन आणि प्रशिक्षण संस्था (वणार्ती) यांच्या वतीने यूपीएससी, एमपीएससी आणि पोलीस भरतीच्या मोफत प्रशिक्षणासाठी राज्यातील ३२ शहरांमधील ६४ केंद्रांवर तीन दिवसीय परीक्षेचे आयोजन करण्यात आले आहे. पहिल्या दिवशी पुण्याच्या आंबेगाव येथील सन ब्राईट इंग्लिश मीडियम स्कूल केंद्रावर विद्यार्थ्यांना संगणक प्रणालीत (कॉम्प्युटर सिस्टीम) लॉग-इन करताना मोठ्या समस्येचा सामना करावा लागला. तर, नांदेडच्या मराठवाडा ऑनलाईन एक्झाम सेंटरवर वीजपुरवठा खंडित झाल्यामुळे संपूर्ण व्यवस्थाच कोलमडली. परिणामी, प्रशासनाला या दोन्ही केंद्रांवरील परीक्षा रद्द करण्याचा निर्णय घ्यावा लागला.
महाज्योतीचे व्यवस्थापकीय संचालक मिलिंद नारिंगे यांनी स्पष्ट केले की, बाधित विद्यार्थ्यांची १० ऑक्टोबरला पुन्हा परीक्षा घेतली जाईल, ज्यासाठी कोणतेही अतिरिक्त शुल्क आकारले जाणार नाही. विद्यार्थ्यांच्या सोयीचा विचार करूनच नवीन परीक्षा केंद्रे निश्चित केली जातील. यासोबतच, या दोन्ही केंद्रांवर झालेल्या तांत्रिक बिघाडाच्या सखोल चौकशीचे आदेश देण्यात आले आहेत. संबंधित अधिकारी आणि परीक्षा घेणाऱ्या एजन्सीकडून सविस्तर अहवाल मागवण्यात आला आहे. सीसीटीव्ही फुटेज आणि तांत्रिक रेकॉर्ड तपासल्यानंतर दोषींवर कठोर कारवाई केली जाईल. वणार्तीचे एमडी प्रशांत वावगे यांनी सांगितले की, राज्यातील उर्वरित ६२ केंद्रांवर परीक्षा सुरळीत पार पडली.
