admin
चिपळूण : प्रतिनिधी
चिपळूण शहराकडून रेल्वे स्थानकाकडे जाणाऱ्या प्रवाशांची सध्या मोठी गैरसोय होत आहे. कोकण रेल्वे महामंडळाने पूर्वी चिपळूण शहर-मुरादपूर दिशेने येणाऱ्या प्रवाशांच्या सोयीसाठी तिकीट खिडकीची स्वतंत्र इमारत बांधली होती. सुरुवातीचे काही महिने येथून तिकीट विक्री झाली, मात्र कालांतराने ही खिडकी कायमची बंद पडली. आज ही इमारत जीर्णावस्थेत पोहोचली असून, तिथे अज्ञात परप्रांतीय कामगारांनी बस्तान बसवले आहे. हे कामगार कोणत्या ठेकेदाराचे आहेत याबाबत कोणतीही माहिती नसून रेल्वे प्रशासनही याकडे सोयीस्करपणे दुर्लक्ष करत आहे. इमारतीची दुरवस्था आणि प्रवाशांची गैरसोय पाहता, कोकण रेल्वे अन्याय निवारण संघर्ष समितीचे अध्यक्ष तथा माजी सभापती शौकत मुकादम यांनी रेल्वे प्रशासनाकडे यासंदर्भात आवाज उठवला होता.
मुकादम यांच्या पाठपुराव्यानंतर रेल्वेने चिपळूण शहराबाजूकडील स्थानक आवारात नवीन पर्यायी तिकीट घर सुरू केले. मात्र, काही दिवस सुरू राहिल्यानंतर हे तिकीट घरही आता बंद अवस्थेत असल्याने रेल्वे प्रशासनाने केवळ प्रवाशांची बोळवण करण्यासाठीच ही खिडकी उघडली होती का, असा संतप्त सवाल प्रवाशांमधून विचारला जात आहे. एकीकडे तिकीट खिडकीचा प्रश्न असताना, दुसरीकडे चिपळूण शहराकडून मुरादपूरमार्गे रेल्वे स्थानकाकडे जाणाऱ्या रस्त्याची अक्षरशः चाळण झाली आहे. रस्त्यावर मोठमोठे खड्डे पडल्याने सर्वत्र चिखलाचे साम्राज्य पसरले आहे. यामुळे या मार्गावरून प्रवास करणे जिकिरीचे झाले असून, वाहनचालकांना मोठी कसरत करावी लागत आहे. रेल्वे प्रशासनाने आणि संबंधित यंत्रणांनी या प्रश्नांकडे तातडीने लक्ष देऊन प्रवाशांची गैरसोय दूर करावी, अशी मागणी आता जोर धरू लागली आहे.
