admin
रत्नागिरी : प्रतिनिधी
आंबा उत्पादक शेतकऱ्यांना ई-पीक पाहणी करताना विविध आंबा जातींची अचूक आणि स्वतंत्र नोंद करता यावी, यासाठी डीसीएस (DCS) ॲपमध्ये आंबा पिकाच्या विविध जातींचा समावेश करण्याची मागणी करण्यात आली आहे. रत्नागिरीचे जिल्हा अधीक्षक कृषी अधिकारी शिवकुमार सदाफुले यांनी यासंदर्भात थेट कृषी आयुक्तालयाला पत्र पाठवून या तांत्रिक बदलाची मागणी केली आहे.
सध्या डीसीएस ॲपद्वारे ई-पीक पाहणी करताना आंबा पिकाच्या नोंदीसाठी केवळ ‘Seed Variety’ हा एकमेव पर्याय उपलब्ध आहे. मात्र, कोकणातील आणि राज्यातील प्रमुख आंबा जातींची नावे स्वतंत्रपणे ॲपमध्ये उपलब्ध नसल्यामुळे प्रत्यक्ष बागेतील पिकाची अचूक नोंद करताना शेतकऱ्यांसमोर अडचणी निर्माण होत आहेत. ही अडचण दूर करण्यासाठी कोकणातील जगप्रसिद्ध हापूससह केशर, रत्ना, सिंधू आणि पायरी या महत्त्वाच्या आंबा जातींचा डीसीएस ॲपमध्ये स्वतंत्र पर्याय म्हणून तातडीने समावेश करावा, असे या पत्रात नमूद करण्यात आले आहे.
आंब्यासोबतच कोकणातील प्रमुख बागायती फळपिके असलेल्या काजू, नारळ आणि सुपारी या पिकांच्या सर्व महत्त्वाच्या जातींचाही ॲपमध्ये समावेश करण्याची विनंती कृषी विभागाकडे करण्यात आली आहे. विविध वाणांची स्वतंत्र नोंद करण्याची सुविधा ॲपमध्ये उपलब्ध झाल्यास शेतकऱ्यांच्या शेतातील पिकांची आकडेवारी अधिक अचूकपणे गोळा होईल, ज्यामुळे ई-पीक पाहणीची संपूर्ण प्रक्रिया अधिक परिणामकारक आणि पारदर्शक होण्यास मोठी मदत होणार आहे.
