admin
चिपळूण : प्रतिनिधी
चिपळूण आणि गुहागर तालुक्यांना जोडणाऱ्या कापशी नदीवरील बहुप्रतीक्षित वीर-काजुर्ली पुलाच्या उभारणीला अखेर प्रशासकीय पातळीवर वेग आला आहे. तब्बल २९ वर्षांपासून प्रलंबित असलेल्या या उच्चस्तरीय पुलासाठी मंत्रालयस्तरावरून स्पष्ट सूचना प्राप्त झाल्यानंतर सार्वजनिक बांधकाम विभागाच्या वरिष्ठ अधिकाऱ्यांनी मंगळवारी प्रस्तावित जागेची प्रत्यक्ष तांत्रिक पाहणी केली. त्यामुळे या भागातील नागरिकांच्या अनेक वर्षांच्या लढ्याला यश मिळण्याची आणि प्रत्यक्ष कामाला सुरुवात होण्याची आशा पल्लवित झाली आहे.
वीर देवपाट (ता. चिपळूण) आणि काजुर्ली (ता. गुहागर) या गावांदरम्यान दळणवळण सुलभ व्हावे, यासाठी १९९९ मध्ये या पुलाची मागणी सर्वप्रथम करण्यात आली होती. सन २००० पासून यासाठी सातत्याने प्रशासकीय पातळीवर पाठपुरावा सुरू होता. सद्यस्थितीत पूल नसल्यामुळे दोन्ही बाजूंच्या गावकऱ्यांना नदी ओलांडण्यासाठी मोठा आणि त्रासदायक वळसा घालावा लागतो. हा नवा पूल अस्तित्वात आल्यास तो केवळ चिपळूण आणि गुहागरपुरता मर्यादित न राहता संगमेश्वर, रत्नागिरीसह थेट मुंबईला ये-जा करणाऱ्या हजारो प्रवाशांसाठी एक महत्त्वाचा आणि वेळ वाचवणारा पर्यायी मार्ग ठरणार आहे.
तांत्रिक प्रस्तावानुसार, कापशी नदीवर उभारला जाणारा हा पूल दुपदरी आणि सुमारे १२० मीटर लांबीचा असेल. पावसाळ्यात नदीची पाणीपातळी प्रचंड वाढत असल्याने वाहतूक विनाअडथळा सुरू राहावी, यासाठी पुलाची उंची आणि रुंदी पुरेशी राखली जाणार आहे. या महत्त्वपूर्ण प्रकल्पामुळे वीर आणि काजुर्ली परिसरातील ३५ हून अधिक गावे एकमेकांशी थेट जोडली जाणार असून, सुमारे २८ हजार लोकसंख्येला याचा प्रत्यक्ष व अप्रत्यक्ष फायदा होणार आहे. या मार्गामुळे स्थानिक व्यापार, कृषी उत्पन्न, शिक्षण, आरोग्य सुविधा आणि पर्यटनाला मोठी चालना मिळून या भागाचा कायापालट होण्याची शक्यता आहे.
या पुलासाठी स्थानिक ग्रामस्थांसह मुंबईस्थित चाकरमानी आणि लोकप्रतिनिधींनी गेले पावणेतीन दशके अविरत संघर्ष केला आहे. पंचायत समिती सदस्य संजय जावळे, ग्रामविकास मंडळाचे अध्यक्ष दीपक पवार, परीक्षित पावसकर, विशाल वीरकर, जयंत वीरकर, काजुर्लीचे पप्पू साळवी यांच्यासह वीर, पूर्वे, शिरंबे, वहाळ, पिलवली, तोंडली व अबिटगाव येथील गावकऱ्यांनी प्रशासनाकडे सातत्यपूर्ण पाठपुरावा केला होता. अधिकाऱ्यांच्या या प्रत्यक्ष पाहणी दौऱ्यानंतर आता तांत्रिक मंजुरीची प्रक्रिया लवकर पूर्ण होऊन पुलाचे स्वप्न प्रत्यक्षात उतरेल, असा विश्वास सर्वसामान्यांमधून व्यक्त केला जात आहे.
