admin
नंदुरबार : नंदुरबार जिल्ह्यातील चौगाव (बु.) येथील जिल्हा परिषद शाळेत मुख्याध्यापक म्हणून कार्यरत असलेले योगेश बाळासाहेब पाटील (वय ४०) यांनी शेअर बाजारातील प्रचंड आर्थिक नुकसानीच्या तणावातून आपल्या कुटुंबासह टोकाचे पाऊल उचलल्याची धक्कादायक घटना सोलापूर जिल्ह्यातील बार्शी तालुक्यातील हातीज येथे उघडकीस आली आहे. पाटील यांनी आपली पत्नी माधुरी योगेश पाटील (वय ३७), अकरा वर्षांचा मुलगा अथर्व आणि नऊ वर्षांचा मुलगा शिवांश यांना आधी विष पाजून त्यांची हत्या केली आणि त्यानंतर स्वतः गळफास लावून आत्महत्या केली. हा सर्व थरारक प्रकार गुरुवारी मध्यरात्रीच्या सुमारास घडला असावा असा प्राथमिक अंदाज पोलिसांनी व्यक्त केला असून, एकाच कुटुंबातील चार जणांच्या अशा दुर्दैवी अंत्यामुळे संपूर्ण परिसरात तीव्र खळबळ उडाली आहे.
ही हृदयद्रावक घटना शुक्रवारी सकाळी नेहमीप्रमाणे दूध देणाऱ्या व्यक्तीमुळे उघडकीस आली. दूधवाल्याने बराच वेळ घराचा दरवाजा ठोठावूनही आतून कोणताही प्रतिसाद न मिळाल्याने संशय बळावला. यानंतर शेजाऱ्यांच्या मदतीने घराचा मुख्य दरवाजा तोडला असता, आतमध्ये अत्यंत धक्कादायक दृश्य पाहायला मिळाले. घरात त्यांची पत्नी आणि दोन्ही मुले अंथरुणावर निपचित पडलेली होती, तर योगेश पाटील हे गळफास घेतलेल्या अवस्थेत आढळून आले. या घटनेची माहिती मिळताच वैराग पोलिसांनी तातडीने घटनास्थळी धाव घेऊन तपास सुरू केला.
पोलिसांना घटनास्थळावरून योगेश पाटील यांनी लिहिलेली तब्बल २२ पानांची सुसाईड नोट हस्तगत करण्यात यश आले आहे. या सविस्तर चिठ्ठीमध्ये त्यांनी शेअर बाजारात झालेले मोठे आर्थिक नुकसान, विविध लोकांसोबत केलेले पैशांचे व्यवहार, कर्ज आणि आपल्या मालमत्तेच्या वाटणीबाबतच्या अंतिम इच्छांचा सविस्तर उल्लेख केल्याची माहिती समोर आली आहे. वैराग पोलिस या सुसाईड नोटच्या आधारे आर्थिक व्यवहारांची कसून चौकशी करत असून, संपूर्ण प्रकरणाचा पुढील तपास सुरू आहे.
