admin
पुणे : प्रतिनिधी
पुण्यातील बाणेर-औंध परिसरात राहणाऱ्या बडतर्फ प्रशिक्षणार्थी आयएएस अधिकारी पूजा खेडकर यांच्या निवासस्थानी शनिवारी मध्यरात्री एक अत्यंत खळबळजनक चोरीची घटना घडली आहे. खेडकर कुटुंबाकडे गेल्या काही दिवसांपूर्वीच कामाला आलेल्या एका नेपाळी नोकराने आपल्या साथीदारांच्या मदतीने हा संपूर्ण बनाव रचल्याचे समोर आले आहे. या आरोपीने पूजा खेडकर यांचे वडील दिलीप खेडकर, आई मनोरमा खेडकर आणि घरातील इतर कर्मचाऱ्यांना जेवणातून गुंगीचे औषध दिले, ज्यामुळे ते सर्वजण बेशुद्ध झाले.
ज्यावेळी पूजा खेडकर घरी आल्या, तेव्हा आरोपींनी त्यांना धाक दाखवून त्यांचे हात-पाय बांधले आणि एका खोलीत कोंडून ठेवले. त्यानंतर चोरट्यांनी घरातील कपाटांमधील मौल्यवान दागिने, रोख रक्कम आणि घरातील सर्व सदस्यांचे मोबाईल फोन घेऊन पोबारा केला. आरोपी पसार झाल्यानंतर पूजा खेडकर यांनी मोठ्या हिमतीने स्वतःची सुटका करून घेतली आणि दुसऱ्या फोनवरून चतुःश्रृंगी पोलिसांना घटनेची माहिती दिली.
माहिती मिळताच पोलिसांनी घटनास्थळी धाव घेत बेशुद्ध असलेल्या दिलीप आणि मनोरमा खेडकर यांना तातडीने रुग्णालयात दाखल केले. सध्या त्यांची प्रकृती स्थिर असून त्यांच्यावर उपचार सुरू आहेत. पोलिसांनी याप्रकरणी गुन्हा दाखल केला असून फरार नोकराचा शोध घेण्यासाठी पथके तैनात केली आहेत. परिसरातील सीसीटीव्ही फुटेजच्या आधारे तपास सुरू असून, या घटनेमुळे पुणे शहरात मोठी खळबळ उडाली आहे.
