admin
नवी दिल्ली :
भारताच्या ८० व्या स्वातंत्र्यदिनाचे औचित्य साधून शनिवारी पंतप्रधान नरेंद्र मोदी यांनी लाल किल्ल्यावरून देशाला संबोधित केले. यावेळी त्यांनी वर्ष २०४७ पर्यंत भारताला एक ‘विकसित राष्ट्र’ बनवण्याचे महत्त्वाकांक्षी लक्ष्य देशासमोर ठेवले. यासाठी देशवासीयांची स्वप्ने, सामर्थ्य आणि संकल्पांवर त्यांनी विशेष भर दिला. मोठी स्वप्ने पाहून मोठे संकल्प साकार करण्याचे आवाहन करतानाच, गेल्या १२ वर्षांत सरकारने नागरिकांसाठी राबवलेल्या विविध योजनांचा त्यांनी आढावा घेतला. या सोहळ्यात पंतप्रधानांनी परिधान केलेल्या लाल रंगाच्या आणि त्यावर पिवळी, हिरवी व पांढरी नक्षी असलेल्या फेट्याने सर्वांचे विशेष लक्ष वेधून घेतले.
देशाला संबोधित करताना पंतप्रधान म्हणाले की, आज प्रत्येकाच्या हृदयाची धडधड ‘वंदे मातरम’च्या शब्दांनी गुंजत आहे. आज ‘हर घर तिरंगा’ सोबतच ‘हर मन तिरंगा’ अशी स्थिती असून, देश एका नव्या उत्साहात आणि नव्या संकल्पांसह पुढे जात आहे. यावेळी त्यांनी देशाच्या स्वातंत्र्यासाठी आपले जीवन समर्पित करणाऱ्या सर्व महान सुपुत्रांना, पूज्य महात्मा गांधींना आणि सर्व क्रांतिकारकांना विनम्र अभिवादन केले.
आपल्या ऐतिहासिक भाषणात पंतप्रधानांनी देशाचा सर्वांगीण विकास आणि आत्मनिर्भरता साध्य करण्यासाठी ‘सप्तधारा’ (सात प्रवाह) ही नवी संकल्पना मांडली. सुधारणांवर भर देताना ते म्हणाले की, आपल्याला सुधारणांचा वेग वाढवण्याची गरज आहे; ही आपली कोणतीही मजबुरी नसून तो आपला दृढ विश्वास आहे. भूतकाळात भारताची स्वावलंबन क्षमता ‘सप्तसिंधू’ म्हणून ओळखली जायची, आता येत्या ५-७ वर्षांत आपल्याला ‘सप्तधारा’ या विचाराने पुढे जायचे आहे. या संपूर्ण विकासप्रक्रियेत तरुणांची भूमिका अत्यंत महत्त्वाची असल्याचे अधोरेखित करत, पंतप्रधानांनी देशव्यापी ‘टॅलेंट हंट’ (प्रतिभा शोध) मोहीम सुरू करण्याची घोषणाही यावेळी केली.
विकसित भारताचे लक्ष्य साध्य करण्यासाठी पंतप्रधानांनी सात प्रवाहांवर (सप्तधारा) लक्ष केंद्रित करण्याचे आवाहन केले. यामध्ये उत्पादन, कृषी आणि अन्न प्रक्रिया, तंत्रज्ञान आणि नवकल्पना, गतीशक्ती, संरक्षण शक्ती, हरित आणि नील अर्थव्यवस्था तसेच सॉफ्ट पॉवर यांचा समावेश आहे. उत्पादन क्षेत्रात खर्च, गुणवत्ता आणि प्रमाणावर भर देत ‘झिरो-डिफेक्ट’ उत्पादनाला भारताची जागतिक ओळख बनवण्याचे आवाहन त्यांनी केले. तसेच कृषी क्षेत्रातील अपार क्षमतांचा पुरेपूर वापर करणे, भारताला ‘ग्लोबल इनोव्हेशन हब’ बनवणे आणि ‘मेड इन इंडिया ६G’ तंत्रज्ञान देशाच्या कानाकोपऱ्यात पोहोचवण्याचा संकल्प त्यांनी व्यक्त केला.
देशातील कनेक्टिव्हिटी अधिक वेगवान करण्यासाठी हाय-स्पीड रेल, मोडल हायवे आणि जलमार्गांच्या माध्यमातून शहरांना जोडण्यावर त्यांनी भर दिला. सध्याच्या जागतिक परिस्थितीत संरक्षण क्षेत्रात आत्मनिर्भर होणे ही काळाची गरज असून, ड्रोन आणि हायपर-सोनिक तंत्रज्ञान विकसित करून देशाची सायबर सुरक्षा मजबूत करण्याची आवश्यकता त्यांनी व्यक्त केली. ग्लोबल वॉर्मिंगवर उपाय म्हणून ‘हरित उत्पादना’वर आणि सागरी अर्थव्यवस्थेच्या संधींचा फायदा घेण्याचे त्यांनी नमूद केले. याशिवाय, योग, ‘हील इन इंडिया’, चित्रपट आणि गेमिंग क्षेत्रातील भारताचे कौशल्य जगासमोर प्रभावीपणे मांडून भारताला जागतिक पर्यटन आणि ‘कॉन्सर्ट इकॉनॉमी’चे सर्वांत मोठे केंद्र बनवण्याचे लक्ष्यही पंतप्रधानांनी देशासमोर ठेवले.
