admin
पुणे :
पुण्यातील कारेगावच्या माजी सरपंच आणि सोशल मीडियावर प्रचंड लोकप्रिय असलेल्या निर्मला नवले यांची राष्ट्रवादी काँग्रेस पक्षाच्या (अजित पवार गट) युवती प्रदेशाध्यक्षपदी निवड करण्यात आली आहे. विशेष म्हणजे, नुकत्याच पार पडलेल्या जिल्हा परिषद आणि पंचायत समिती निवडणुकांमध्ये त्यांना पराभवाचा सामना करावा लागला होता. असे असले तरी, पक्षाने त्यांच्यावर विश्वास दाखवत त्यांच्या खांद्यावर आता संपूर्ण महाराष्ट्राच्या युवती प्रदेशाध्यक्षपदाची मोठी जबाबदारी सोपवली आहे.
नुकत्याच झालेल्या पंचायत समितीच्या निवडणुकीत राष्ट्रवादी काँग्रेस पक्षाने निर्मला नवले यांना शिरूरमधील कारेगाव गणातून उमेदवारी दिली होती. मात्र, या निवडणुकीत भारतीय जनता पक्षाच्या मनीषा पाचंगे यांनी नवले यांचा तब्बल २७०० मतांनी पराभव केला. या पराभवानंतरही पक्षाने त्यांचे राजकीय पुनर्वसन करत थेट प्रदेश पातळीवरील पद त्यांना दिले आहे. पक्षाच्या नेत्या सुनेत्रा पवार यांच्या हस्ते नवले यांना या नव्या पदाचे नियुक्तीपत्र प्रदान करण्यात आले.
आपल्या या निवडीबद्दल भावना व्यक्त करताना निर्मला नवले यांनी सोशल मीडियावर एक पोस्ट शेअर केली आहे. यामध्ये त्यांनी म्हटले आहे की, त्यांच्या कार्यावर विश्वास ठेवून त्यांना सुरुवातीला कार्याध्यक्षपदाची आणि आता थेट महाराष्ट्र प्रदेशाध्यक्षपदाची जबाबदारी देण्यात आली आहे. हा क्षण त्यांच्यासाठी अत्यंत भावनिक आणि अभिमानाचा असल्याचे त्यांनी आपल्या पोस्टमध्ये नमूद केले आहे.
आयटी इंजिनिअर असलेल्या निर्मला नवले या सरपंचपदी विराजमान झाल्यानंतर ‘उच्चशिक्षित सरपंच’ म्हणून सर्वत्र चर्चेत आल्या होत्या. त्यांचे सोशल मीडियावर ५ लाखांहून अधिक फॉलोअर्स असून, त्या नेहमीच सक्रिय असतात. काही काळापूर्वी त्यांच्या पतीने त्यांना ‘रेंज रोव्हर’ (Range Rover) गाडी भेट दिल्यानंतर त्यांनी शेअर केलेला एक व्हिडीओ सोशल मीडियावर प्रचंड व्हायरल झाला होता, ज्यामुळे त्या अधिकच प्रसिद्धीस आल्या होत्या.
