admin
नाशिक : प्रतिनिधी
नाशिक शहरात महिलांवरील अत्याचाराच्या घटना थांबण्याचे नाव घेत नसल्याचे चित्र आहे. नुकत्याच उघडकीस आलेल्या अशोक खरात आणि रवींद्र एरंडे प्रकरणांच्या धक्क्यातून शहर सावरत असतानाच, आता एका नामांकित बहुराष्ट्रीय कंपनीत (MNC) महिला कर्मचाऱ्यांवर लैंगिक अत्याचार आणि विनयभंग झाल्याची खळबळजनक घटना समोर आली आहे. याप्रकरणी पोलिसांनी आतापर्यंत ९ गुन्हे दाखल केले असून ६ संशयित आरोपींना अटक केली आहे.
नेमकी घटना काय?
नाशिकमधील एका प्रतिष्ठित एमएनसी कंपनीत काम करणाऱ्या काही पुरुष कर्मचाऱ्यांकडून महिला सहकाऱ्यांचा छळ केला जात असल्याचे उघड झाले आहे. पीडित महिलांनी दिलेल्या तक्रारीनुसार, कामाच्या ठिकाणी त्यांचा लैंगिक छळ करणे, मानसिक त्रास देणे आणि धार्मिक भावना दुखावणारे वर्तन करण्यात आले. या गंभीर प्रकारामुळे औद्योगिक क्षेत्रात मोठी खळबळ उडाली आहे.
SIT कडून तपास सुरू
या प्रकरणाचे गांभीर्य ओळखून नाशिक पोलीस आयुक्तांच्या मार्गदर्शनाखाली विशेष तपास पथक (SIT) स्थापन करण्यात आले आहे. सहायक पोलीस आयुक्त संदीप मिटके यांनी सांगितले की, या प्रकरणाचा सर्व बाजूंनी सखोल तपास सुरू असून अन्य कोणाचा सहभाग आहे का, याचाही शोध घेतला जात आहे.
