admin
नंदुरबार :
अल्पवयीन मुले आणि तरुणांचे लैंगिक शोषण करून त्यांचे व्हिडिओ बनवणाऱ्या एका २२ वर्षीय तरुणाला नंदुरबार पोलिसांनी बेड्या ठोकल्या आहेत. चेतन प्रकाश कोळी (वय २२, रा. रायसिंगपुरा, नंदुरबार) असे या नराधमाचे नाव असून, त्याच्या मोबाईलमधून तब्बल ३०० हून अधिक आक्षेपार्ह व्हिडिओ आणि छायाचित्रे जप्त करण्यात आली आहेत. या धक्कादायक घटनेमुळे संपूर्ण नंदुरबार जिल्ह्यात खळबळ उडाली आहे.
जिल्हा पोलीस अधीक्षक अश्विनी सानप यांनी दिलेल्या माहितीनुसार, संशयित आरोपी २०२२ पासून अल्पवयीन मुलांना पैशांचे आमिष दाखवून आणि त्यांच्याशी सलगी वाढवून त्यांचे लैंगिक शोषण करत होता. तसेच, या कृत्याचे व्हिडिओ मोबाईलमध्ये रेकॉर्ड करून ते सोशल मीडियावर व्हायरल करण्याची धमकी देऊन तो पीडितांना ब्लॅकमेल करत असे. ६ ऑगस्ट रोजी संशयित आरोपी भोणे फाटा परिसरात एका अल्पवयीन मुलाला भेटण्यासाठी येणार असल्याची गुप्त माहिती शहर पोलीस निरीक्षक संदीप पाटील यांना मिळाली होती. त्यानुसार पोलिसांनी सापळा रचून त्याला रंगेहाथ ताब्यात घेतले.
फॉरेन्सिक तज्ज्ञांच्या उपस्थितीत मोबाईलची तपासणी केली असता एका ‘गुप्त फोल्डर’मध्ये हे सर्व डिजिटल पुरावे सापडले. याप्रकरणी पोलीस कॉन्स्टेबल रुपेश पगारे यांच्या फिर्यादीवरून आरोपीविरुद्ध भारतीय न्याय संहिता (BNS), पोक्सो (POCSO) आणि बाल न्याय अधिनियमांतर्गत अत्यंत गंभीर स्वरूपाचे गुन्हे दाखल करण्यात आले आहेत. सध्या पोलीस या प्रकरणाचा सखोल तपास करत असून इतर पीडितांची ओळख पटवण्याचे काम सुरू आहे.
