admin
मुंबई :
राज्यातील सागरी वाहतूक अधिक आधुनिक, पर्यावरणपूरक आणि आत्मनिर्भर बनवण्याच्या दिशेने एक मोठे पाऊल टाकत मुंबई वॉटर मेट्रो प्रकल्पासाठी अत्याधुनिक जलवाहने उपलब्ध करून देण्यासाठी आणि सिंधुदुर्ग जिल्ह्यात जलयान निर्मिती सुविधा विकसित करण्यासाठी महाराष्ट्र सागरी मंडळ (MMB) व मेसर्स झोया मरीन सर्व्हिसेस प्रायव्हेट लिमिटेड यांच्यात मंत्रालयात सामंजस्य करारावर (MoU) स्वाक्षरी करण्यात आली आहे. मत्स्यव्यवसाय आणि बंदरे मंत्री नितेश राणे यांच्या प्रमुख उपस्थितीत झालेल्या या करारादरम्यान त्यांनी सांगितले की, मुख्यमंत्री देवेंद्र फडणवीस यांच्या नेतृत्वाखाली महाराष्ट्राच्या सागरी क्षेत्रात मोठ्या प्रमाणावर गुंतवणूक आकर्षित करण्यावर विशेष भर दिला जात आहे. मुंबई वॉटर मेट्रो प्रकल्पासाठी अत्याधुनिक जलवाहने उपलब्ध करून देण्यासोबतच, सिंधुदुर्गमध्ये इलेक्ट्रिक बोट निर्मिती उद्योगाच्या स्थापनेमुळे राज्याच्या सागरी अर्थव्यवस्थेला एक नवीन बळ मिळेल, ज्यामुळे स्थानिक तरुणांसाठी रोजगाराच्या नव्या संधी निर्माण होतील आणि आधुनिक जलयान निर्मितीला चालना मिळेल.
या सामंजस्य करारानुसार, मुंबई वॉटर मेट्रो प्रकल्पासाठी आवश्यक असलेली आधुनिक आणि पर्यावरणपूरक जलवाहने उपलब्ध करून दिली जातील. दुसरीकडे, सिंधुदुर्ग जिल्ह्यातील सावंतवाडी तालुक्यातील तळवणे येथे सुमारे बावीस एकर जमिनीवर जवळपास १५० कोटी रुपयांच्या गुंतवणुकीतून एक अत्याधुनिक इलेक्ट्रिक बोट निर्मिती कारखाना स्थापन केला जाईल. या प्रकल्पामुळे महाराष्ट्रात हरित सागरी वाहतुकीला चालना मिळण्यासोबतच जलयान निर्मितीच्या क्षेत्रात नवीन आणि प्रगत तंत्रज्ञानाचा वापर वाढेल. या ऐतिहासिक प्रसंगी परिवहन आणि बंदरे विभागाचे अप्पर मुख्य सचिव संजय सेठी, महाराष्ट्र सागरी मंडळाचे वरिष्ठ अधिकारी, मेसर्स झोया मरीन सर्व्हिसेस प्रायव्हेट लिमिटेडचे संचालक जॉन फर्नांडिस, संचालक सूरज देवाढिया, अंबर आयंदे आणि डॉ. निलेश बानवलीकर यांच्यासह अनेक मान्यवर उपस्थित होते.
