admin
संगमेश्वर: मुंबई-गोवा राष्ट्रीय महामार्गावरील संगमेश्वर तालुक्यातील तूरळ येथील गणपती मंदिराजवळ शुक्रवारी दुपारी एक भीषण अपघात घडला असून एका भरधाव वेगाने जाणाऱ्या टेम्पोने रस्त्याच्या कडेला उभ्या असलेल्या कंटेनरला पाठीमागून जोरदार धडक दिली आहे. ही धडक इतकी भीषण होती की धडकेनंतर टेम्पो महामार्गावरच पलटी झाला आणि त्याच्या केबिनचा पूर्णपणे चेंदामेंदा होऊन कोल्हापूर येथील चालक रितेश पाटील हा रक्ताच्या थारोळ्यात केबिनमध्येच अडकून पडला होता. अपघात घडताच स्थानिक नागरिकांनी आणि पत्रकार मिलिंद चव्हाण यांनी आपल्या सहकाऱ्यांसह तातडीने घटनास्थळी धाव घेत मोठ्या शर्थीच्या प्रयत्नाने चालकाला केबिनमधून बाहेर काढले आणि तात्काळ १०८ रुग्णवाहिकेद्वारे संगमेश्वर ग्रामीण रुग्णालयात दाखल केले, परंतु त्याची प्रकृती चिंताजनक असल्याने प्राथमिक उपचार करून त्याला पुढील उपचारासाठी रत्नागिरी जिल्हा शासकीय रुग्णालयात हलवण्यात आले आहे. अपघाताची माहिती मिळताच महामार्ग पोलिसांनी घटनास्थळी दाखल होत क्रेनच्या साहाय्याने अपघातग्रस्त वाहने बाजूला करून महामार्गावरील वाहतूक पूर्ववत सुरळीत केली असली, तरी मुंबई-गोवा महामार्गावरील आरवली ते तळेकांटे या पट्ट्यात सातत्याने वाढणाऱ्या भीषण अपघातांमुळे वाहनचालकांमध्ये तीव्र भीतीचे वातावरण निर्माण झाले असून संबंधित प्रशासनाने या मृत्यूच्या सापळ्यावर तातडीने ठोस उपाययोजना कराव्यात, अशी मागणी स्थानिक ग्रामस्थांकडून केली जात आहे.
