admin
मुंबई : प्रतिनिधी
मुंबईच्या कोस्टल रोडवर पहाटेच्या सुमारास एका भरधाव बीएमडब्ल्यू (BMW) कारचा भीषण अपघात झाला असून, यामध्ये तीन तरुणांचा मृत्यू झाला आहे. ही दुर्घटना लाला कॉलेजसमोरील लोटस जेटीजवळ पहाटे ५.२० वाजता घडली. मरीन ड्राईव्हवरून हाजी अलीच्या दिशेने जाणारी डीडी०१-सी-६३०२ (DD01-C-6302) या क्रमांकाची बीएमडब्ल्यू कार कोस्टल रोडच्या कडेला असलेल्या डिव्हायडर आणि इलेक्ट्रिक पोलला जोरदार धडकून पुलावरून थेट खाली कोसळली.
या भीषण अपघातात धैर्य दर्शन शेठ (१७), आदित्य जकासनिया (१९) आणि शमय गजर (२१) या तीन तरुणांना आपला जीव गमवावा लागला. तर, आदित्य कल्पेश्वर ओसवाल (२३) हा तरुण गंभीर जखमी झाला असून, नायर रुग्णालयात त्याची प्रकृती चिंताजनक असल्याने त्याला व्हेंटिलेटरवर ठेवण्यात आले आहे. अपघातग्रस्त बीएमडब्ल्यू कार दादरा आणि नगर हवेली येथे फाल्गुन गजर यांच्या नावावर नोंदणीकृत असून, मृतांपैकी एकाचे ते नातेवाईक आहेत. हे सर्व मृत आणि जखमी तरुण मूळचे अहमदाबादचे रहिवासी असून, शिक्षणासाठी ते मुंबईतील जुहू आणि कुर्ला येथे राहत होते.
या दर्दनाक अपघाताचा पुढील तपास ताडदेव पोलीस करत आहेत. ताडदेव पोलिसांच्या सीनियर पोलीस इन्स्पेक्टर मीना जगताप यांनी दिलेल्या माहितीनुसार, प्राथमिक तपासात अपघाताच्या वेळी बीएमडब्ल्यू कारचा वेग ताशी २०० किलोमीटरपेक्षा जास्त असल्याचे समोर आले आहे. अतिवेगामुळे चालकाचे स्टीअरिंगवरील नियंत्रण सुटल्याने हा अपघात घडल्याचा प्राथमिक अंदाज आहे. मात्र, संपूर्ण तपासानंतरच अपघाताचे नेमके कारण स्पष्ट होऊ शकेल, असे पोलिसांनी स्पष्ट केले आहे.
