admin
मुंबई:
मुंबई पोलीस दलात त्या वेळी एकच खळबळ उडाली, जेव्हा लाचलुचपत प्रतिबंधक विभागाने (एसीबी) बोरीवली पोलीस ठाण्यातील एका पोलीस उपनिरीक्षकाला (पीएसआय) लाच घेताना रंगेहाथ पकडले. ज्ञानेश्वर पराडे असे आरोपी पीएसआयचे नाव असून, त्याने एका गुन्ह्यात कारवाई टाळण्यासाठी दीड लाख रुपयांची लाच मागितली होती. एसीबीच्या पथकाने पोलीस ठाण्याच्या आवारातच १ लाख ३० हजार रुपये रोख स्वीकारताना त्याला बेड्या ठोकल्या.
मिळालेल्या माहितीनुसार, ६५ वर्षीय ज्येष्ठ नागरिकाने २९ सप्टेंबर रोजी मुंबई एसीबीकडे लिखित तक्रार दाखल केली होती. तक्रारदार आणि त्यांच्या दोन बहिणींविरुद्ध दाखल असलेल्या एका प्रकरणात अटकेपासून संरक्षण मिळण्यासाठी पीएसआय ज्ञानेश्वर पराडे यांनी सुरुवातीला १ लाख ५० हजार रुपयांची मागणी केली होती. त्यानंतर आपापसातील तडजोडीअंती लाचेची ही रक्कम १ लाख ३० हजार रुपये ठरवण्यात आली होती.
तक्रारदाराच्या अर्जावर कारवाई करत एसीबीने ३० सप्टेंबर रोजी पंचांसमक्ष लाचेच्या मागणीची पडताळणी केली. लाच मागितल्याचे निष्पन्न झाल्यानंतर, एसीबीने ५ ऑक्टोबर रोजी बोरीवली पोलीस ठाण्यात सापळा रचला. जताच तक्रारदाराने पीएसआय पराडे यांच्याकडे १ लाख ३० हजार रुपये सुपूर्द केले, तशी एसीबीच्या पथकाने त्यांना रंगेहाथ अटक केली.
या कारवाई दरम्यान आरोपी पोलीस अधिकाऱ्याचा मोबाईल फोन जप्त करण्यात आला असून त्याच्या घराचीही कसून झडती घेण्यात आली आहे. आरोपीविरोधात भ्रष्टाचार प्रतिबंधक कायदा १९८८ च्या कलम ७ अन्वये गुन्हा दाखल करण्यात आला आहे. सध्या मुंबई एसीबीचे पथक या प्रकरणाचा सखोल तपास करत असून या घटनेमुळे संपूर्ण पोलीस वर्तुळात मोठी चलबिचल सुरू आहे.
