admin
रत्नागिरी : प्रतिनिधी
तालुक्यातील कुर्धे येथे (लिंगायतवाडी ते खोताचीवाडी दरम्यान) नदीवर जिल्हा परिषद बांधकाम कंत्राटदाराकडून पुलाचे काम सुरू असताना झालेल्या मोठ्या दुर्घटनेत एका कामगाराचा मृत्यू झाल्यानंतर शिवसेना (उद्धव बाळासाहेब ठाकरे) पक्ष कमालीचा आक्रमक झाला आहे. या अवैध आणि बोगस बांधकामाची उच्चस्तरीय चौकशी करून दोषींवर सदोष मनुष्यवधाचा गुन्हा दाखल करावा, या मागणीचे निवेदन रत्नागिरी तालुकाप्रमुख मयुरेश्वर पाटील यांच्या नेतृत्वाखाली जिल्हा परिषद अध्यक्षा अस्मिता केंद्रे यांना सुपूर्द करण्यात आले.
मंगळवारी पुलाचा काँक्रीटचा भाग कोसळून एका निष्पाप कामगाराचा जागीच मृत्यू झाला होता. या प्रकरणात सर्वात धक्कादायक बाब ही समोर आली आहे की, या बांधकामाचे कोणतेही अंदाजपत्रक (बजेट), प्रशासकीय मंजुरी, निविदा (टेंडर) किंवा वर्क ऑर्डर अस्तित्वातच नव्हती. “कोणतीही अधिकृत परवानगी नसताना कंत्राटदाराने नेमक्या कोणाच्या आदेशावरून हे काम सुरू केले होते?” असा अत्यंत तिखट सवाल शिवसेनेने या निवेदनाद्वारे उपस्थित केला आहे.
रत्नागिरी जिल्ह्यात अनेक ठिकाणी कंत्राटदारांची मनमानी आणि बोगस कामे सुरू असल्याचा आरोप करत शिवसेनेने पुढील मागण्या केल्या आहेत:
-
अशा अवैध कामांना भविष्यात कोणतीही मंजुरी किंवा निधी दिला जाऊ नये.
-
विनापरवानगी काम करणाऱ्या संबंधित कंत्राटदाराची नोंदणी (लायसन्स) त्वरित रद्द करण्यात यावी.
-
या भ्रष्टाचारात जिल्हा परिषदेचे अधिकारीही सामील असल्याचे आढळल्यास, त्यांच्यावरही कडक कायदेशीर कारवाई करून त्याचा लेखी अहवाल सादर करावा.
हे निवेदन देताना शिवसेना आणि युवासेनेचे अनेक प्रमुख पदाधिकारी उपस्थित होते. यामध्ये प्रामुख्याने युवासेना जिल्हाप्रमुख प्रसाद सावंत, उपतालुकाप्रमुख विजय देसाई, उपशहरप्रमुख सलील डाफळे, विभागप्रमुख किरण तोडणकर, साजिद पासवकर, उपविभागप्रमुख सचिन सावंतदेसाई, अजिंक्य सनगरे आणि आदेश (आबू) भाटकर आदींचा समावेश होता.
