admin
सांगली:
राष्ट्रवादी काँग्रेसचे (शरदचंद्र पवार) प्रदेशाध्यक्ष आणि ज्येष्ठ नेते जयंत पाटील यांनी प्रस्तावित ‘शक्तिपीठ महामार्गा’ला तीव्र विरोध दर्शवत राज्य सरकारला सज्जड दम भरला आहे. सांगली जिल्हाधिकारी कार्यालयावर काढण्यात आलेल्या एका विशाल मोर्चामध्ये बोलताना त्यांनी सरकारवर जोरदार हल्लाबोल केला. “हा तुरुंग फोडणाऱ्या वसंतदादा पाटील आणि क्रांतिसिंह नाना पाटील यांच्यासारख्या शूरवीरांचा जिल्हा आहे. सरकारने आमचे आंदोलन दडपण्यासाठी विशेष अधिकारी पाठवले आहेत, मात्र सांगलीची जनता सरकारच्या या दडपशाहीचा पूर्ण ताकदीने सामना करेल,” असे पाटील म्हणाले. तसेच, जर सरकारी अधिकारी शेतकऱ्यांच्या जमिनी मोजण्यासाठी आले, तर जनता त्यांना त्यांच्याच भाषेत जशास तसे उत्तर देईल, असा खणखणीत इशाराही त्यांनी दिला. या मोर्चामध्ये महिलांची लक्षणीय उपस्थिती होती. तसेच काँग्रेस नेते सतेज पाटील, स्वाभिमानी शेतकरी संघटनेचे राजू शेट्टी आणि रासप नेते महादेव जानकर हे देखील या आंदोलनात सहभागी झाले होते.
यावेळी जयंत पाटील यांनी राज्य सरकारच्या ढासळलेल्या आर्थिक स्थितीवरही कडाडून टीका केली. ते म्हणाले की, सध्या मुंबईच्या आझाद मैदानावर कंत्राटदार त्यांच्या तब्बल ९० हजार कोटी रुपयांच्या थकबाकीसाठी उपोषणाला बसले आहेत. राज्यातील आमदारांना त्यांच्या हक्काचा निधीही मिळत नाहीये. सरकारच्या तिजोरीत खडखडाट असतानाही केवळ बाहेरून कर्ज काढून नव्या रस्त्यांचे टेंडर वाटण्याचा उद्योग सरकारकडून सुरू आहे. टेंडर काढून मलई खाण्याचा हा प्रकार आता तत्काळ थांबला पाहिजे, अशी आक्रमक मागणी त्यांनी केली.
शक्तिपीठ महामार्गाला होत असलेला विरोध केवळ सांगली, कोल्हापूर किंवा सोलापूरपुरता मर्यादित नसून परभणी, हिंगोली आणि लातूर येथील जनताही या प्रकल्पाविरोधात प्रचंड आक्रमक असल्याचा दावा पाटील यांनी केला. सत्ताधारी पक्षाचे आमदार आणि खासदार या ज्वलंत मुद्द्यावर बोलण्यास घाबरत आहेत, असा टोला लगावत त्यांनी सत्ताधाऱ्यांच्या मौनावर निशाणा साधला. सत्ताधारी नेत्यांनी आता जनतेसमोर आपली भूमिका स्पष्ट केली पाहिजे; दोन्ही डगरींवर हात ठेवून चालणार नाही, अशी दुटप्पी भूमिका नेत्यांनी आता सोडून द्यावी, असेही जयंत पाटील यांनी ठणकावून सांगितले.
