admin
टी-२० विश्वचषक २०२६ च्या सुपर-८ फेरीत दक्षिण आफ्रिकेने भारताचा ७६ धावांनी मोठा पराभव केला आहे. अहमदाबादच्या नरेंद्र मोदी स्टेडियमवर काल (२२ फेब्रुवारी) झालेल्या या सामन्यात भारताचा सलग १२ सामन्यांचा विजयी रथ रोखला गेला असून या पराभवामुळे टीम इंडियाच्या सेमीफायनलच्या मार्गात आता मोठे अडथळे निर्माण झाले आहेत.
अहमदाबादच्या संथ खेळपट्टीवर दक्षिण आफ्रिकेने नाणेफेक जिंकून प्रथम फलंदाजी करण्याचा निर्णय घेतला होता. सुरुवातीला जसप्रीत बुमराहने घातक मारा करत आफ्रिकेची अवस्था ३ बाद २० अशी केली होती, मात्र त्यानंतर डेव्हिड मिलर आणि डेवाल्ड ब्रेविस यांनी ९७ धावांची महत्त्वपूर्ण भागीदारी करून डावाला आकार दिला. डेव्हिड मिलरने ३५ चेंडूत ६३ धावांची झंझावाती खेळी केली, तर ट्रिस्टन स्टब्सने शेवटच्या षटकात हार्दिक पांड्याला लक्ष्य करत २३ चेंडूत नाबाद ४४ धावा कुटल्या. यामुळे दक्षिण आफ्रिकेने २० षटकांत ७ बाद १८७ धावांचा डोंगर उभा केला. भारताकडून जसप्रीत बुमराहने १५ धावांत ३ बळी घेतले, तर अर्शदीप सिंगने २ गडी बाद केले.
१८८ धावांच्या आव्हानाचा पाठलाग करताना भारतीय फलंदाजी पूर्णपणे कोलमडली. सलामीवीर इशान किशन शून्यावर बाद झाला, तर अभिषेक शर्मा (१५) आणि टिळक वर्मा (१) स्वस्तात माघारी परतले. कर्णधार सूर्यकुमार यादवही मोठी खेळी करू शकला नाही आणि १८ धावांवर झेलबाद झाला. मधल्या फळीत शिवम दुबेने ४२ धावांची एकाकी झुंज दिली, पण त्याला दुसऱ्या टोकाकडून कोणाचीही साथ मिळाली नाही. केशव महाराजने एकाच षटकात हार्दिक पांड्या आणि रिंकू सिंगला बाद करून भारताच्या उरल्यासुरल्या आशा संपुष्टात आणल्या. दक्षिण आफ्रिकेच्या मार्को जानसेनने २२ धावांत ४ बळी घेत भारताचा डाव १८.५ षटकांत १११ धावांत गुंडाळला.
या पराभवामुळे भारताचा नेट रनरेट उणे ३.८०० (-3.800) इतका खाली घसरला आहे. आता सेमीफायनल गाठण्यासाठी भारताला झिम्बाब्वे (२६ फेब्रुवारी) आणि वेस्ट इंडिज (१ मार्च) यांच्याविरुद्धचे आगामी दोन्ही सामने मोठ्या फरकाने जिंकावे लागणार आहेत.
