admin
दापोली:
दापोली-खेड महामार्गावरील वाकवली-शिरशिंगे फाट्याजवळ मंगळवारी सकाळी साडेआठ ते नऊच्या दरम्यान एक अत्यंत दुर्दैवी अपघात घडला. दापोलीकडून खेडच्या दिशेने जाणाऱ्या दोन तरुणींच्या दुचाकीवरील ताबा सुटल्याने त्यांची गाडी रस्त्याकडच्या नाल्यात कोसळली.
या भीषण दुर्घटनेमध्ये २२ वर्षीय सेजल पांडुरंग भागवत हिचा जागीच मृत्यू झाला आहे, तर दुसरी तरुणी वैष्णवी चंद्रकांत अहिरे ही गंभीर जखमी झाली असून तिच्यावर सध्या रुग्णालयात उपचार सुरू आहेत.
अपघाताचा मोठा आवाज ऐकताच परिसरातील स्थानिकांनी व ग्रामस्थांनी तात्काळ घटनास्थळी धाव घेत मदतकार्य केले. तसेच, घटनेची माहिती मिळताच पोलिसांनीही तातडीने घटनास्थळी पोहोचून परिस्थितीचा आढावा घेतला.
दरम्यान, या महामार्गावरील निकृष्ट दर्जाचे काम, मोऱ्यांजवळ साचलेला गाळ आणि पाण्याचा योग्य निचरा न झाल्यामुळेच ही दुर्दैवी दुर्घटना घडल्याचा गंभीर आरोप स्थानिकांनी आणि शिवसेना उद्धव बाळासाहेब ठाकरे पक्षाच्या वतीने करण्यात आला आहे. तसेच, याप्रकरणी संबंधित ठेकेदारावर सदोष मनुष्यवधाचा गुन्हा दाखल करावा, अशी तीव्र मागणी आता जोर धरत आहे.
