admin
मंडणगड : प्रतिनिधी
येथील महाराष्ट्रीय यादव चॅरिटी ट्रस्टच्या सभागृहात भारतीय जनता पार्टी, उत्तर रत्नागिरी जिल्हा कार्यकारिणीची महत्त्वपूर्ण बैठक नुकतीच उत्साहात पार पडली. या बैठकीत पक्षाच्या आगामी संघटनात्मक कामकाजाचा सविस्तर आढावा घेण्यात आला. तसेच, भविष्यातील राजकीय वाटचालीसाठी महत्त्वपूर्ण रणनीतीवर सखोल चर्चा करण्यात आली.
बैठकीच्या सुरुवातीला सद्यस्थितीतील राजकीय आणि सामाजिक विषयांवर व्यापक मंथन करण्यात आले. त्यानंतर भाजपा नेते तथा खेड नगर परिषदेचे माजी नगराध्यक्ष ॲड. वैभव खेडेकर आणि भाजपा उत्तर रत्नागिरी जिल्हाध्यक्ष सतीश मोरे यांनी सर्व प्रमुख पदाधिकाऱ्यांशी संवाद साधला. आगामी काळात स्थानिक पातळीवर पक्ष संघटना अधिक मजबूत करण्यासाठी आणि प्रत्येक मतदारांपर्यंत पोहोचण्यासाठी सर्व कार्यकर्त्यांनी ‘बूथ स्तरावर’ अत्यंत प्रभावी व सूक्ष्म नियोजन करून काम करावे, असे आवाहन या दोन्ही नेत्यांनी यावेळी केले.
या महत्त्वपूर्ण बैठकीला जिल्ह्यातील विविध भागांतून आलेले पदाधिकारी मोठ्या संख्येने उपस्थित होते. रत्नागिरी जिल्हा महामंत्री निलेश सुर्वे, जिल्हा सरचिटणीस अक्षय फाटक, वसंत ताम्हणकर, युवा मोर्चाचे जिल्हाध्यक्ष संकल्प अवेरे, अल्पसंख्याक सेलचे जिल्हाध्यक्ष रहीम सहिबोल, अजय दळवी, ॲड. मिलिंद नांदगावकर, जयाताई साळवी, विनोद चाळके, शशांक सिनकर, धीरज पटेल, शुभम गायकवाड, स्वराज गांधी, प्रदीप भोसले, ओवैस चौगुले आणि सर्वेश पवार आदींसह अनेक प्रमुख कार्यकर्ते सहभागी झाले होते. आगामी काळात पक्षाची संघटनात्मक बांधणी अधिक तळागाळापर्यंत पोहोचवण्याचा दृढ संकल्प करत या बैठकीची सांगता झाली.
