admin
मुंबई: प्रतिनिधी
गायिका आणि मिसेस मुख्यमंत्री अमृता फडणवीस यांच्याबद्दल गायिका अंजली भारती हिने अत्यंत खालच्या पातळीवर जाऊन केलेल्या एका विधानामुळे महाराष्ट्राच्या राजकीय आणि सामाजिक वर्तुळात मोठी खळबळ उडाली आहे. एका संदर्भात बोलताना अंजली भारती हिने थेट ‘बलात्काराचा’ उल्लेख करत अमृता फडणवीस यांच्यावर वैयक्तिक आणि गलिच्छ टिप्पणी केली आहे. या वक्तव्यानंतर सोशल मीडियावर संतापाची लाट उसळली असून अंजली भारतीवर कडक कारवाईची मागणी होत आहे.
नेमके प्रकरण काय?
मिळालेल्या माहितीनुसार, एका वादाच्या ओघात अंजली भारती हिने अमृता फडणवीस यांच्याबद्दल बोलताना भाषेची मर्यादा ओलांडली. तिने केलेल्या विधानात महिलांच्या सन्मानाला ठेच पोहोचवणारे आणि अत्यंत हिणकस शब्दांचा वापर करण्यात आला होता. विशेषतः बलात्कारासारख्या गंभीर विषयाचा संदर्भ देऊन केलेल्या या टिप्पणीमुळे केवळ भाजपच नाही, तर इतर पक्षांतील महिला नेत्यांनीही संताप व्यक्त केला आहे.
ठाकरे गटाकडूनही निषेध
राजकीय मतभेद बाजूला ठेवून शिवसेना (उद्धव बाळासाहेब ठाकरे) गटाच्या नेत्या आणि मुंबईच्या माजी महापौर किशोरी पेडणेकर यांनी या प्रकरणाची गंभीर दखल घेतली आहे. त्यांनी सोशल मीडियाच्या माध्यमातून अंजली भारतीचा तीव्र शब्दांत निषेध केला.
“राजकारणात आणि वैयक्तिक आयुष्यात विचार भिन्न असू शकतात, पण एका महिलेबद्दल अशा प्रकारची गलिच्छ भाषा वापरणे हे कोणत्याही परिस्थितीत सहन केले जाणार नाही. शिवसेना महिला आघाडी या वक्तव्याचा निषेध करते,” असे पेडणेकर यांनी स्पष्ट केले.
भाजप आक्रमक; अटकेची मागणी
अमृता फडणवीस यांच्यावरील या टीकेनंतर भाजप महिला आघाडी आक्रमक झाली आहे. अंजली भारती हिच्यावर विनयभंग आणि बदनामीचे गुन्हे दाखल करून तिला तात्काळ अटक करावी, अशी मागणी गृहविभागाकडे करण्यात आली आहे. सोशल मीडियावरही नेटिझन्सनी “एका महिलेने दुसऱ्या महिलेबद्दल इतके खालचे विधान करणे लाजिरवाणे आहे,” अशा प्रतिक्रिया दिल्या आहेत.
कायदेशीर कारवाईचे संकेत
याप्रकरणी सायबर सेल आणि पोलीस प्रशासनाकडून व्हिडिओची पडताळणी केली जात असून, सार्वजनिक शांतता भंग करणे आणि महिलेचा विनयभंग केल्याप्रकरणी अंजली भारतीवर गुन्हा दाखल होण्याची शक्यता वर्तवण्यात येत आहे.
