आंबेनळी घाटात स्कॉर्पिओ दरीत कोसळली; ८ तरुणांचा दुर्दैवी मृत्यू

सातारा : कोकण पर्यटनावरून परतताना महाबळेश्वरजवळील आंबेनळी घाटात झालेल्या भीषण अपघातात ८ तरुणांचा मृत्यू झाल्याची हृदयद्रावक घटना समोर आली आहे. हर्णे बंदरावर मित्राचा वाढदिवस साजरा करून शनिवारी रात्री साताऱ्याकडे निघालेली स्कॉर्पिओ गाडी आंबेनळी घाटातील एका वळणावर चालकाचे नियंत्रण सुटल्यामुळे थेट १ हजार फूट खोल दरीत कोसळली. या अपघाताची माहिती सोमवारी सकाळी उघडकीस आली असून, गाडीतील नितीन किसन नायकोंडे, उत्कर्ष आनंद शिंगटे, अनिल अभिमन्यू शिंगटे, महेश अनिल पवार, रितेश राजेंद्र लोखंडे, आदित्य अशोक साळुंखे, सुहास जितेंद्र लोखंडे आणि अंश समीर चव्हाण या आठही तरुणांचा दुर्दैवी मृत्यू झाला आहे. मृतांमध्ये सातारा तालुक्यातील आसगाव येथील पाच तरुणांचा समावेश असून, हे सर्व तरुण आपल्या आई-वडिलांना एकुलते एक होते, या माहितीने संपूर्ण परिसरात मोठी शोककळा पसरली आहे.