admin
मुंबई: राज्याच्या विधान परिषद निवडणुकीत उमेदवारी अर्ज मागे घेण्याच्या शेवटच्या दिवशी अनेक नाट्यमय घडामोडी घडल्या असून महायुतीचे ६ वजनदार उमेदवार बिनविरोध निवडून येणार आहेत, तर उर्वरित ११ मतदारसंघांमध्ये येत्या १८ जून रोजी मतदान होणार आहे. या निवडणुकीत भाजप, शिंदेसेना आणि अजित पवार गटाच्या प्रत्येकी दोघांचा मार्ग मोकळा झाला आहे. यामध्ये राष्ट्रवादी काँग्रेस (अजीत पवार गट) प्रदेशाध्यक्ष खा. सुनील तटकरे यांचे पुत्र अनिकेत तटकरे (रायगड-रत्नागिरी-सिंधुदुर्ग), माजी खासदार संजय काकडे यांचे पुत्र विक्रम काकडे (पुणे), शिंदेसेनेचे दुष्यंत सतीश चतुर्वेदी (यवतमाळ), मुख्यमंत्री एकनाथ शिंदे यांच्या गोटातील रवींद्र फाटक (ठाणे), भाजपचे जुनेजाणते अरुण लखानी (वर्धा-चंद्रपूर-गडचिरोली) आणि भाजपचे प्राजक्त तनपुरे (अहिल्यानगर) या सहा उमेदवारांसमोर आता कोणीही विरोधक उरलेला नाही.
अहिल्यानगरमध्ये अजित पवार गटाचे नेते तथा अपक्ष उमेदवार दत्तात्रय पानसरे यांच्या माघारीच्या अर्जावर स्वाक्षरीवरून मोठा हायव्होल्टेज ड्रामा रंगला, मात्र भाजप नेत्यांच्या मनधरणीनंतर त्यांनी आक्षेप मागे घेतल्याने प्राजक्त तनपुरे यांची निवड बिनविरोध झाली. दुसरीकडे, उमेदवारांच्या ऐनवेळच्या यू-टर्नमुळे महाविकास आघाडीवर मोठी नामुष्की ओढवली आहे; यवतमाळमध्ये काँग्रेसचे राज्य सरचिटणीस साहेबराव कांबळे, भंडारा मतदारसंघात काँग्रेसचे अधिकृत उमेदवार दिलीप बनसोड, नांदेडमध्ये काँग्रेसचे अधिकृत उमेदवार रामदास सुमठाणकर आणि छत्रपती संभाजीनगर-जालना मतदारसंघात उद्धवसेनेच्या उमेदवार देवयानी डोणगावकर यांनी अखेरच्या क्षणी माघार घेतल्याने मविआला मोठा धक्का बसला आहे.
दरम्यान, पूर्ण बंडखोरी शमविण्यात महायुतीला अपयश आले असून नाशिक आणि जळगावमध्ये महायुतीतील मित्रपक्षच एकमेकांसमोर उभे ठाकले आहेत. नाशिकमध्ये भाजपच्या गणेश गिते यांनी माघार घेतली असली तरी त्यांचे सख्खे बंधू गोकुळ आणि भाजपचे पदाधिकारी बळीराम हिरे यांचे वारस प्रसाद हिरे रिंगणात कायम असल्याने शिंदेसेनेचे उमेदवार नरेंद्र दराडे यांच्यासमोर मोठे आव्हान उभे राहिले आहे, तर जळगावमध्ये शिंदेसेनेच्या नगरसेविका रेश्मा कुंदन काळे यांनी उमेदवारी कायम ठेवल्याने तेथे आता चौरंगी लढत पाहायला मिळणार आहे. या नाट्यमय घडामोडींनंतर आता सांगली-satara, सोलापूर, नागपूर, भंडारा-गोंदिया, अमरावती, जळगाव, नाशिक, छत्रपती संभाजीनगर-जालना, धाराशिव-लातूर-बीड, नांदेड आणि परभणी-हिंगोली या ११ स्थानिक स्वराज्य संस्था मतदारसंघांतील चित्र स्पष्ट झाले असून तेथे १८ जून रोजी मतदान प्रक्रिया पार पडणार आहे.
