admin
हैदराबाद: तेलंगणातील रंगारेड्डी जिल्ह्यात मंगळवारी सायंकाळी एक काळजाचा थरकाप उडवणारी घटना घडली आहे. अचानक आलेल्या वादळी पावसामुळे सुरक्षिततेसाठी पत्र्याच्या शेडमध्ये आडोशाला गेलेल्या कामगारांवर अवाढव्य क्रेन कोसळली. या भीषण अपघातात ५ कामगारांचा जागीच मृत्यू झाला असून ११ जण जखमी झाले आहेत. मृतांमध्ये सर्व कामगार हे बिहारचे रहिवासी असल्याची प्राथमिक माहिती समोर आली आहे.
नेमकी घटना काय? मिळालेल्या माहितीनुसार, रंगारेड्डी जिल्ह्यातील शंकरपल्ली मंडलांतर्गत येणाऱ्या महालिंगापूरम गावातील एनसीसी (NCC) सेंट्रल वर्कशॉपमध्ये ही दुर्घटना घडली. मंगळवारी अचानक वातावरणात बदल झाला आणि सोसाट्याचा वारा सुटून मुसळधार पाऊस सुरू झाला. कामावर असलेल्या १६ कामगारांनी पावसापासून बचाव करण्यासाठी वर्कशॉपमधील एका पत्र्याच्या शेडचा आश्रय घेतला. मात्र, वाऱ्याचा वेग इतका प्रचंड होता की जवळच असलेली एक महाकाय क्रेन थेट या शेडवर कोसळली.
बचावकार्य आणि मृतांची ओळख क्रेन कोसळल्याने पत्र्याचे शेड पूर्णपणे दबले गेले आणि त्याखाली सर्व कामगार अडकले. घटनेची माहिती मिळताच स्थानिक प्रशासन, पोलीस आणि बचाव पथकांनी घटनास्थळी धाव घेतली. क्रेनखाली अडकलेल्या कामगारांना बाहेर काढण्यासाठी युद्धपातळीवर प्रयत्न करण्यात आले. या दुर्घटनेत अली हुसेन, नागेंद्र सिंग, सजीम, मुकेश कुमार आणि सोनू राजिबी या ५ कामगारांचा मृत्यू झाला आहे. हे सर्वजण रोजगारासाठी बिहारमधून आले होते.
जखमींची प्रकृती चिंताजनक या दुर्घटनेत जखमी झालेल्या ११ कामगारांना तातडीने जवळच्या विविध रुग्णालयांत दाखल करण्यात आले आहे. जखमींपैकी काहींची प्रकृती अत्यंत चिंताजनक असल्याचे डॉक्टरांकडून सांगण्यात येत आहे. पोलीस या प्रकरणाचा अधिक तपास करत असून वर्कशॉपमधील सुरक्षेच्या नियमांचे उल्लंघन झाले आहे का, याचीही पडताळणी केली जात आहे.
