admin
नवी दिल्ली: केंद्रीय शिक्षणमंत्र्यांच्या राजीनाम्याची मागणी करत दिल्लीतील जंतरमंतर येथे आमरण उपोषणाला बसलेले प्रसिद्ध सामाजिक कार्यकर्ते सोनम वांगचुक यांची प्रकृती खालावल्याने दिल्ली उच्च न्यायालयाने केंद्र आणि दिल्ली सरकारला नोटीस बजावत तातडीने पावले उचलण्याचे निर्देश दिले आहेत. प्रत्येक नागरिकाचे आयुष्य मौल्यवान असून ते वाचवण्यासाठी शासकीय प्राधिकरणांनी सर्वतोपरी प्रयत्न केले पाहिजेत, अशी महत्त्वपूर्ण टिप्पणी न्यायालयाने यावेळी केली. वांगचुक यांचे उपोषण सोडवण्यासाठी आणि त्यांच्या जिवाला असलेला धोका लक्षात घेऊन सामाजिक कार्यकर्ते व वकील राकेश कुमार सैनी यांनी हायकोर्टात जनहित याचिका दाखल केली होती. जर वांगचुक यांचे उपोषण असेच सुरू राहिले, तर पुढील दोन दिवसांत त्यांच्या जिवाचे बरेवाईट होऊ शकते, अशी भीती या याचिकेत व्यक्त करण्यात आली होती. या गंभीर परिस्थितीची दखल घेत, शासकीय डॉक्टरांच्या विशेष पथकाद्वारे वांगचुक यांच्या प्रकृतीचे दररोज काटेकोर निरीक्षण केले जावे आणि त्यांचे प्राण वाचवण्यासाठी सर्व आवश्यक वैद्यकीय उपचार व प्रयत्न केले जावेत, असे स्पष्ट आदेश दिल्ली उच्च न्यायालयाने प्रशासनाला दिले आहेत.
