adminखेड (प्रतिनिधी) :
तालुक्यातील सर्वसामान्य नागरिकांच्या प्रलंबित समस्या, गाऱ्हाणी आणि शासकीय कामांमधील अडथळे दूर करण्यासाठी भारतीय जनता पक्ष प्रदेशाध्यक्ष आमदार रवींद्र चव्हाण यांचे विशेष कार्य अधिकारी संतोष साखरे यांच्या प्रमुख उपस्थितीत खेड येथील शासकीय विश्रामगृहात ‘जनता दरबार’ पार पडला. या दरबारात तालुक्यातील अनेक नागरिकांनी आपल्या समस्या मांडल्या असून, त्या तात्काळ सोडविण्याचे निर्देश साखरे यांनी संबंधित विभागांना दिले.
खेड तालुक्यातील दुर्गम आणि ग्रामीण भागातील नागरिकांना आपल्या कामांसाठी वारंवार शासकीय कार्यालयांचे उंबरठे झिजवावे लागतात. ही अडचण लक्षात घेऊन आमदार रवींद्र चव्हाण यांच्या सूचनेनुसार संतोष साखरे यांनी या जनता दरबाराचे आयोजन केले होते. यावेळी रस्ते विकास, पाण्याचे प्रश्न, वीज पुरवठा आणि महसूल विभागाशी संबंधित तक्रारींचा पाऊस पडला.
प्रशासकीय कामात पारदर्शकता हवी “सर्वसामान्य जनतेला न्याय मिळवून देणे हेच आमचे प्राथमिक कर्तव्य आहे. नागरिकांचे प्रश्न केवळ कागदावर न राहता ते प्रत्यक्षात सुटले पाहिजेत. प्रशासन आणि जनता यांच्यातील दरी कमी करण्यासाठी अशा उपक्रमांची नितांत गरज आहे,” असे प्रतिपादन संतोष साखरे यांनी यावेळी केले.
अनेकांना मिळाला तात्काळ दिलासा या जनता दरबारात उपस्थित असलेल्या विविध विभागांच्या अधिकाऱ्यांना साखरे यांनी काही प्रकरणांमध्ये जागीच मार्ग काढण्याच्या सूचना दिल्या. रखडलेल्या शासकीय योजनांचा लाभ लाभार्थ्यांपर्यंत वेळेत पोहोचवण्यासाठी पाठपुरावा केला जाईल, असेही त्यांनी स्पष्ट केले. या उपक्रमामुळे खेडमधील नागरिकांनी समाधान व्यक्त केले असून, साखरे यांच्या या पुढाकाराचे सर्वत्र कौतुक होत आहे.
याप्रसंगी स्थानिक भाजप पदाधिकारी, कार्यकर्ते आणि मोठ्या संख्येने खेड तालुक्यातील नागरिक उपस्थित होते.
