admin
मुंबई : शिवसेना (उद्धव बाळासाहेब ठाकरे) पक्षाचे नेते आणि खासदार संजय राऊत यांनी नवी दिल्लीत प्रसारमाध्यमांशी बोलताना पक्षाच्या खासदारांमध्ये फूट पडण्याच्या चर्चा पूर्णपणे फेटाळून लावल्या आहेत. ‘शिवसेनेचे सर्व खासदार एकत्र आहेत आणि ते एकत्रच राहतील’, असा ठाम विश्वास त्यांनी व्यक्त केला. विरोधकांकडून सुरू असलेल्या ‘ऑपरेशन टायगर’च्या अफवांना त्यांनी फोल ठरवले असून, राजकीय क्षेत्रात चालणाऱ्या फोडोफोडीच्या राजकारणावर आणि सत्ताधारी भाजपवर कडाडून टीका केली आहे.
संजय राऊत यांनी भाजपचा उल्लेख ‘खरेदी-विक्री संघ’ असा करत म्हटले की, राजकीय लोक आता हातात सुऱ्या-कात्र्या घेऊन ऑपरेशन करायला लागले आहेत, तर खरी ऑपरेशन्स रुग्णालयात होतात. तृणमूल काँग्रेसच्या काही खासदारांनी नॅशनलिस्ट सिटीझन्स पार्टीत प्रवेश केल्याच्या मुद्द्यावरून त्यांनी भाजपच्या या कृतीला त्यांची ‘भूक’ की ‘हाव’ असा सवाल केला. तसेच, पक्षप्रमुख उद्धव ठाकरे हे कोणाला भेटत नसल्याच्या अफवांवर स्पष्टीकरण देताना त्यांनी सांगितले की, महाराष्ट्रात शरद पवारांनंतर कार्यकर्त्यांना आणि लोकप्रतिनिधींना सर्वाधिक भेटणारा उद्धव ठाकरेंसारखा दुसरा नेता नाही. ग्रामीण भागातील खासदार आणि आमदार मुंबईत आल्यावर नियमितपणे ‘मातोश्री’वर जाऊन त्यांची भेट घेतात. विरोधकांच्या धाकावर बोलताना ते म्हणाले की, हा धाक मोदी किंवा अमित शहांचा नसून त्यांच्या हातातील ईडी आणि सीबीआयचा आहे, सत्ता गेल्यानंतर हा धाक उरणार नाही. कोणत्याही खासदाराने मंत्र्यांची किंवा पंतप्रधानांची कामासाठी भेट घेणे ही सामान्य बाब असून, राष्ट्रहिताच्या किंवा राज्याच्या कामासाठी आपण स्वतः देखील मुख्यमंत्र्यांना वा पंतप्रधानांना भेटू शकतो, कारण ते संपूर्ण देशाचे आणि राज्याचे असतात, असेही त्यांनी यावेळी स्पष्ट केले.
