admin
राजापूर :
मुंबई-गोवा राष्ट्रीय महामार्गावरील कोदवली येथील महालक्ष्मी मंदिराजवळील धोकादायक वळणावर गुरुवारी सायंकाळी पाच वाजण्याच्या सुमारास मिठाने भरलेला एक ट्रक पलटी झाल्याची घटना घडली. या अपघातात ट्रकचा चालक किरकोळ जखमी झाला असून, सुदैवाने कोणतीही जीवितहानी टळली आहे.
मिळालेल्या सविस्तर माहितीनुसार, (GJ-12-BV-6644) क्रमांकाचा हा ट्रक मुंबईहून गोव्याच्या दिशेने मिठाची पोती घेऊन चालला होता. महालक्ष्मी मंदिराजवळील अत्यंत तीव्र वळणावर चालकाचे अचानक वाहनावरील नियंत्रण सुटले. त्यामुळे हा ट्रक प्रथम रस्ता दुभाजकावर (Divider) चढला आणि त्यानंतर थेट विरुद्ध दिशेच्या मार्गावर जाऊन पलटी झाला.
अपघातानंतर ट्रकमधील मिठाची पोती संपूर्ण महामार्गावर विखुरली गेली, ज्यामुळे काही काळ वाहतूक विस्कळीत झाली होती. मात्र, ज्या वेळी हा अपघात घडला, त्या वेळी समोरील मार्गावर कोणतीही वाहने नसल्यामुळे एक मोठा अनर्थ टळला.
अपघाताची माहिती मिळताच स्थानिक पोलिसांनी तातडीने घटनास्थळी धाव घेतली. पोलिसांनी वाहतूक सुरळीत करण्यासाठी महामार्गावर बॅरिकेड्स उभारले आणि आवश्यक उपाययोजना करत अपघाताची नोंद करून पुढील तपास सुरू केला. दरम्यान, शुक्रवारी सकाळी हा पलटी झालेला ट्रक क्रेनच्या सहाय्याने हटविण्याचे काम हाती घेण्यात आले.
कोदवली परिसरातील या धोकादायक वळणावर यापूर्वीही अनेकदा छोटे-मोठे अपघात झाले आहेत. त्यामुळे या ठिकाणी प्रशासनाकडून कायमस्वरूपी सुरक्षिततेच्या उपाययोजना तातडीने कराव्यात, अशी मागणी संतप्त वाहनचालक आणि स्थानिक नागरिकांकडून पुन्हा एकदा जोर धरू लागली आहे.
